इटहरी/ बलिउडकी चर्चित नायिका तथा आइटम क्वीन नोरा फतेही जेष्ठ ३ गते काठमाडौं आउने भएकी छिन् । ‘नोरा फतेही लाइभ इन नेपाल’ शीर्षकमा बौद्ध टुसालस्थित हायात ग्राउण्डमा आयोजना हुने यस भव्य साँझमा उनले नेपाली दर्शकलाई आफ्ना विश्वप्रसिद्ध डान्स स्टेप्समार्फत नचाउनेछिन् । यो कार्यक्रम शिक्षाबाट बञ्चित बालबालिकाका लागि काम गर्दै आएको संस्था ‘ह्युमन रेस्पेक्ट नेपाल’को सहयोगार्थ आयोजना गरिंदैछ ।
वर्ल्डवाइड फिल्म्स नेटवर्क प्रा.लि.ले कार्यक्रम आयोजना गर्नेछ भने मनु मिडिया प्रा.लि.ले इभेन्ट व्यवस्थापनको जिम्मा लिएको छ । इभेन्ट म्यानेजर मनिष कार्कीका अनुसार, यसपटकको शो नेपालमा अहिलेसम्म भएका अन्तर्राष्ट्रिय कार्यक्रमहरूमध्ये सबैभन्दा उत्कृष्ट हुने दाबी गरिएको छ । नोरा फतेही मुम्बईबाट २० भन्दा बढी पेशेवर डान्सरहरूको टोलीसहित नेपाल आउनेछिन् । कार्यक्रममा नेपाली कलाकारहरूको पनि विशेष प्रस्तुति रहने जानकारी आयोजक संस्थाका अध्यक्ष देव मगरले दिएका छन् ।
नोरा फतेहीका ‘दिलबर दिलबर’, ‘ओ साकी साकी’, ‘कुसु कुसु’, र ‘नाच मेरी रानी’ जस्ता गीतहरूले बलिउडमा तहल्का मच्चाएका थिए । नेपालका साथै भारतको सीमावर्ती क्षेत्रका दर्शक पनि कार्यक्रममा सहभागी हुने विश्वास आयोजकले लिएको छ । दर्शकहरूले नृत्य र संगीतको भरपुर मजा लिन सक्नेछन् । कार्यक्रमको टिकट दर २ हजार, ४ हजार, ७ हजार र १६ हजार निर्धारण गरिएको छ भने आइतबारदेखि ‘खल्ती’ एपमार्फत टिकट बिक्री सुरु हुने जानकारी दिइएको छ । अन्तर्राष्ट्रिय समन्वयकर्ताका रूपमा युद्ध बानियाँ रहनेछन् ।
Discussion about this post