इटहरी/ फिल्म ‘जन्ते बाख्रो’को पहिलो गीत ‘घामै राजा’ सार्वजनिक भएको छ । निर्देशक सिमोस सुनुवार निर्देशित यस फिल्म सार्वजनीक रोमान्टिक गीतमा मुख्य कलाकार सौगात मल्ल र गरिमा शर्मा देखिएका छन्, जसमा संगीतकार बाबुल गिरीको शब्द, संगीत तथा स्वर रहेको छ । बिहीबार काठमाण्डौ आयोजित एक कार्यक्रमका बीच सार्वजनिक गरिएको यो गीतको अन्त्यमा अभिनेता आशिफ शाहलाई सप्राइज पात्रका रूपमा प्रस्तुत गरिएको छ ।
फिल्मले आफ्नो प्रदर्शन मिति पनि हेरफेर गरेको छ । यसअघि जेठ २३ लाई तोकिएको भए पनि सौगात मल्लकै अर्को फिल्म ‘भाईरल गोर्खे’ सोही समयमा आउने भएकाले ‘जन्ते बाख्रो’ अब जेठ ९ गतेबाट रिलिज हुने निर्माण टिमले जनाएको छ । निर्माता सन्तोष गौतमले दर्शकमाझ राम्रो प्रभाव पार्नका लागि दुई हप्ताअघि नै फिल्मलाई रिलिज गर्ने निर्णय गरिएको बताए । नेपालका साथै विदेशमा पनि एकसाथ प्रदर्शन गर्ने तयारी भइरहेको उनको भनाइ छ । हेर्नुस् भिडियो ।
निर्देशक सुनुवारले आफ्ना अघिल्ला फिल्मका अनुभवलाई समेट्दै ‘जन्ते बाख्रो’लाई उत्कृष्ट बनाउने प्रयास गरेको बताए । कथा लेखनदेखि कलाकार छनोटसम्म निकै मेहनत गरिएको हुँदा दर्शकले रुचाउने विश्वास उनले व्यक्त गरे । अभिनेत्री गरिमा शर्मा पहिलो पटक यो फिल्मबाट मुख्य भूमिकामा देखिँदै छिन् । सौगात, गरिमा र आशिफसँगै फिल्ममा रमा थपलिया, लोकेन्द्र लेखक, कमल देवकोटा, विशाल पहाडी, रुशा न्यौपाने, कुसुम शर्मा, स्नेहा जोशी, समापिका गौतम, कुशल गजमेर लगायतका कलाकारको अभिनय रहनेछ ।
मुईन इन्टरटेनमेन्टको ब्यानरमा बनेको ‘जन्ते बाख्रो’ सामाजिक कमेडी फिल्म हो । जसको कथा, पटकथा र संवाद प्रदीप भारद्धाजले लेखेका हुन् । फिल्मका डीओपी हरि हुँमागाई, सिनेमाटोग्राफर उत्तम हुँमागाई, सम्पादक सुनिल शिवभक्ती, पोस्टर डिजाइन टिम रोयल भिमसेन (ट्राइडेन्ट कन्सेप्ट) रहेका छन् । टिफल्क फिल्मस्ले वितरण गर्ने फिल्मको डिजिटल अधिकार जी टु वान डिजिटलले खरिद गरिसकेको छ ।
Discussion about this post