फिल्म ‘हेल्लो काँशीराम’को गीत ‘झ्यामकी मादल झ्याम’को तस्बिर सार्वजनिक

इटहरी/ आगामी जेठ २ गतेलाई प्रदर्शन मिति तोकिएको फिल्म ‘हेल्लो काँशीराम’को प्रचार अभियान दिनप्रतिदिन आक्रामक बन्दै गएको छ । केही हप्ता अघि फस्टलुक पोस्टर सार्वजनिक गरेर प्रचार प्रारम्भ गरेको निर्माण टिमले अहिले फिल्मको गीत ‘झ्यामकी मादल झ्याम’को तस्बिर सार्वजनिक गर्दै प्रचारलाई थप गति दिएको छ । सार्वजनिक तस्बिरमा अभिनेता दिलिप रायमाझीसँग अभिनेत्री प्रियंका कार्कीको नृत्य दृश्य देख्न सकिन्छ ।

काठमाडौंमा विशेष सेट निर्माण गरी छायांकन गरिएको यस गीतमा ६४ जना कोरस डान्सर रहेका छन् भने, कोरियोग्राफी कबिराज गहतराजले गरेका छन् । प्रताप दास र मेलिना राईको स्वर रहेको गीतलाई नयाँ वर्ष लक्षित गरी सार्वजनिक गर्ने तयारी गरिएको निर्माण टिमले जनाएको छ । फिल्मको फस्टलुक पोस्टरले दर्शकको ध्यान तानेको छ । पोस्टरमा दिलिप रायमाझी काँधमा बोका बोकेर हिँडिरहेको देखिन्छ, जसले फिल्मलाई कमेडी शैलीको बनावट दिएको संकेत गर्छ ।

रिम विश्वकर्माको लेखन तथा निर्देशनमा तयार भएको यस फिल्ममा दिलिप रायमाझीसँगै सुरवीर पण्डित, रामचन्द्र अधिकारी, सुशील पोखरेल, उमेश राई ‘फुलन्देको आमा’, अर्जुन गुरुङ, नवज्योती रसाइली, सुमन खाँण, अजय न्यौपाने, सरोज केसी, उमेश मायालु लगायतका कलाकारको अभिनय रहेको छ । फिल्ममा प्रियंका कार्कीको विशेष भूमिका रहेको बताइएको छ, तर निर्माण टिमले यसबारे थप विवरण खुलाएको छैन ।

रेडलाइन फिल्म्सको ब्यानरमा निर्माण भएको यस फिल्मका निर्माता पी.बी. थापा हुन् । यम आलेले छायांकन गरेको फिल्ममा द्वन्द्व निर्देशन शंकर महर्जन, सम्पादन मित्र डी. गुरुङ, संगीत संयोजन नरेन्द्र वियोगी र विपिन आचार्यले गरेका छन् । पार्श्व संगीत शाश्वत श्रेष्ठको रहेको छ । निर्देशक रिम विश्वकर्माले ‘हेल्लो काँशीराम’ कमेडी जनरामा बनेको भए पनि फिल्ममा भावनात्मक पक्षहरू पनि समेटिएको बताएका छन् । सम्पादनको सम्पूर्ण काम पूरा भइसकेको र केही हप्ताभित्र फिल्मको सार्वजनिक सामग्री बाहिर ल्याउने तयारी भइरहेको निर्माण टिमले जानकारी दिएको छ ।