इटहरी/ नेपालमा सामाजिक सञ्जालको प्रभाव बढ्दै जाँदा भाइरल हुनकै लागि जस्तोसुकै हर्कत गर्ने प्रवृत्ति मौलाउँदै गएको छ । यही विषयवस्तुमा केन्द्रित रही निर्माण भएको फिल्म ‘भाईरल गोर्खे’ को टिजर सार्वजनिक भएको छ । आगामी जेठ ३० गतेबाट प्रदर्शनमा आउने यो फिल्मको २ मिनेट ८ सेकेन्ड लामो टिजर शुक्रबार सार्वजनिक गरिएको हो ।
गोपाल पाँडे पात्रको भाइरल बन्ने लोभ र त्यसपछि आउने परिदृश्यहरू सार्वजनीक टिजरमा प्रस्तुत गरिएको छ । विशेषगरी, उनको अनौठा हर्कतदेखि भाइरल भइसकेपछि लाइभ सत्रमा फ्यानहरूसँग साक्षात्कार गर्ने दृश्य सम्मको कथा झल्काएको छ । पत्रकार ऋषि धमलासँगको अन्तर्वार्ता टिजरको थप आकर्षक पक्ष बनेको छ । हेर्नुस् टिजर ।
द जिएमआई एकेडेमी र निर्भाना फिल्म स्कुलको व्यानरमा बनेको यस फिल्ममा सौगात मल्ल, सृष्टि श्रेष्ठ, बुद्धि तामाङ, लक्ष्मी गिरी, राजाराम पौडेल र ऋषि धमलाको अभिनय रहेको छ ।
फिल्मका निर्माता विशाल ताम्राकार, महेश लामिछाने र केवलजंग कुँवर हुन् भने भुवन अधिकारी र निखिल पौडेल सह-निर्माता रहेका छन् । अमर महर्जनको सिनेमाटोग्राफी रहेको यो फिल्म लमजुङको भुजुङ गाउँ, गोरखा र चितवनका रमणीय स्थानहरूमा छायांकन गरिएको हो । सामाजिक सन्देश बोकेको ‘भाईरल गोर्खे’ ले दर्शकलाई हास्यव्यङ्ग्यसहितको गम्भीर कथावस्तु दिन सक्ने अपेक्षा गरिएको छ ।
Discussion about this post