इटहरी/ यही चैत २९ गते रिलिजको तयारीमा रहेको प्रतिक्षित फिल्म ‘कर्मा’को पहिलो गीत सार्वजनिक भएको छ । नेपाली संस्कृतिको झल्को दिने ‘सारी लगाइदेउ’ बोलको गीत दर्शक-स्रोतामाझ ल्याइएको हो । सलिना बिकको स्वरमा रहेको गीतलाई सुष्मा सिग्देलले शब्दबद्ध गरेकी छन् भने भाष्कर स्वारले संगीत भरेका छन् । भाष्कर स्वार र सुवास पौडेलको एरेन्ज रहेको गीतलाई शास्वत श्रेष्ठले मिक्सिङ तथा मास्टरिङ गरेका छन् ।
नेपाली समाजमा प्रचलित रत्यौली संस्कृतिमा आधारित यो गीत प्रेम, व्यंग्य र परम्परागत मर्दपनको भाव बोकेको छ । सार्वजनीक गीतको भिडियोमा फिल्मका प्रमुख कलाकार विपीन कार्की र उपासना सिंह ठकुरीको दमदार अभिनय देख्न सकिन्छ । कोरियोग्राफर कविराज गहतराजको निर्देशनमा तयार पारिएको भिडियोमा रत्यौली संस्कृतिको झल्को देख्न सकिन्छ । विशेषगरी, महिलाको भेषभूषामा देखिएका विपीन कार्कीले भिडियोमा थप रमाइलोपन ल्याएका छन् । हेर्नुस् गीत ।
फिल्म ‘कर्मा’मा विपीन, उपासनाका साथै मुकुन भुसाल, सरिता गिरी, दिब्यदेब, बेन बस्नेत, सुज्यान सिलवाल, अनिल बुढाथोकी, निर्मल शर्मा लगायतका कलाकारको अभिनय रहेको छ । एक्सन, सस्पेन्स र ड्रामाको मिश्रण रहेको यो फिल्मका निर्देशक चौधरी हुन्, जसले यसअघि ‘अगस्त्यः च्याप्टर १’ निर्देशन गरेका थिए । फिल्मको अन्तर्राष्ट्रिय प्रदर्शन अधिकार सेभेन सिज सिनेमाले लिएको छ ।
फिल्मकोको द्वन्द्व निर्देशन श्री श्रेष्ठ, सम्पादन निमेष श्रेष्ठ, भिएफएक्स समीर मिया, पृष्ठभूमि संगीत उत्तम न्यौपाने, टिजर-ट्रेलर निर्माण शाहिल खान, पब्लिसिटी डिजाइन विजय बाश्याल तथा कलर ग्रेडिङ राजेन्द्र मोक्तानले गरेका छन् । वसन्त लम्सालको लगानी रहेको यो फिल्म आर्टिस्टिक इन्टरटेनमेन्टको ब्यानरमा बनेको पहिलो फिल्म हो । पोष्टर, टिजर र गीत रिलिजसंगै नेपालसहित विदेशमा पनि एकसाथ प्रदर्शन हुने यो फिल्म ‘कर्मा’को ट्रेलरको प्रतिक्षा निकै बढ्दो छ ।
Discussion about this post