इटहरी/ नेपालको लोककथा, अध्यात्म र सस्पेन्सको अनौठो संयोजन प्रस्तुत गर्ने तयारीमा रहेको फिल्म ‘खेल’को दोस्रो पोस्टर सार्वजनिक गरिएको छ । आगामी वैशाख १२ गते प्रदर्शन हुन गइरहेको यो फिल्म रहस्यमय कथावस्तुका कारण दर्शकमाझ विशेष चासोको विषय बनेको छ । पोस्टरमा सुरक्षा पन्त, मोनिका थापा, हेना नगरकोटी, निकिता आचार्य, समापिका गौतम, मिथिला शर्मा, सरिता गिरी र भोलाराज सापकोटा देखिएका छन् ।
रोयल भीमसेनले डिजाइन गरेको पोस्टर गाढा निलो र कालो रङको संयोजनमा तयार पारिएको छ, जसले रहस्य र डरको आभास गराउँछ । अगाडि स्कुले विद्यार्थीहरू देखिन्छन् भने पृष्ठभूमिमा डर लाग्दो आँखाहरूको छाया रहेको छ । पोस्टरमा चन्द्रमाको समावेशीकरणले कथाको गूढ पक्ष झल्काउँछ । हेडफोन लगाएकी सुरक्षा पन्त प्रमुख पात्रका रूपमा प्रस्तुत भएकी छन् ।
यो फिल्मलाई अनुराग प्रधान र आस्था श्रेष्ठले संयुक्त रूपमा निर्देशन गरेका छन् । काठमाडौंको एक होस्टेलमा बस्ने चार साथीहरूको कथा प्रस्तुत गर्दै यो फिल्मले उनीहरूलाई पछ्याइरहेको भयानक विगतलाई उजागर गर्नेछ । किरण श्रेष्ठ, भावना घिमिरे, सुहानी खड्का क्षेत्री लगायत कलाकारहरूको अभिनय रहेको यो फिल्म सिरुपाते कट्स प्रालिको ब्यानरमा निर्माण भएको हो । निर्माताहरू लुइसराज महर्जन र आशिषराज महर्जन हुन् भने सह-निर्माताका रूपमा कुणानराज गुरुङ र रहिशराज महर्जन छन् ।
यो फिल्मको कथा आशिषराज महर्जनले लेखेका हुन् भने पटकथा अभितेन्द्र र अनुराग प्रधानले तयार पारेका छन् । संवाद विष्णु गैरेको रहेको छ । छायाङ्कन रोशन राई र सञ्जय लामा ले गरेका छन् भने सम्पादन आशिषराज महर्जनको रहेको छ । प्राविधिक पक्षमा ध्वनि डिजाइन विकल प्रधान, रङ संयोजन राजेन्द्र मोक्तान, प्रोडक्सन डिजाइन किशोर नेपाल, कस्ट्युम डिजाइन एलेक्स बसुकला, मेकअप दिपु पौडेल रहेका छन् । प्रोडक्सन म्यानेजरको जिम्मेवारी यमप्रसाद ओलीले सम्हालेका छन् । फिल्मको वितरण डिसिएनले गर्नेछ भने पब्लिसिटी ट्राइडेन्ट कन्सेप्टले डिजाइन गरेको छ ।
Discussion about this post