इटहरी/ नेपाली कथानक फिल्म ‘डोरी’को ट्रेलर आइतबार काठमाडौंको नयाँ बानेश्वरस्थित आइएनआइ सिनेमाजमा एक विशेष समारोहबीच सार्वजनिक गरिएको छ । समारोहमा लेखक, निर्देशक तथा प्रमुख अभिनेता अरुण लामा, अभिनेत्री अञ्जना बराइली, अभिनेता प्रवीण खतिवडा, शिशिर बाङ्देल, साजन श्रेष्ठ, बिरेन्द्र सिंह कुशवाहा, राज पौडेल, राज थापा, नूतन, शारदा अधिकारी, रामबाबु रेग्मी सङ्गीतकार तथा गायक राजनराज शिवाकोटी लगायत फिल्मका प्राविधिक तथा कलाकारहरूको उपस्थिति थियो ।
रहस्यमय र थ्रिलर शैलीमा प्रस्तुत गरिएको यो फिल्म चैत १५ गतेबाट प्रदर्शन हुँदैछ । ट्रेलरमा फिल्मको शीर्षकअनुसार ‘डोरी’ वरिपरि कथा घुमेको देखिन्छ । कथामा डोरी शक्ति राख्ने विशेष वस्तु हो, जसको खोजीमा विभिन्न पात्रहरू लागेका छन् । यस क्रममा आउने चुनौती, पारिवारिक तथा सामाजिक द्वन्द्वलाई ट्रेलरले उठान गरेको छ । केही दृश्यहरूमा थ्रिलर तथा हररको मिश्रण गरिएको छ, जसले दर्शकलाई रहस्यमय वातावरणमा डुबाउने संकेत गर्छ । हेर्नुस् ट्रेलर।
निर्देशक अरुण लामाका अनुसार, ‘डोरी’ सामाजिक कथामा आधारित छ, जसले सबैको जीवनसँग कुनै न कुनै रूपमा सम्बन्ध राख्छ ।’ उनले थ्रिल र हररलाई “दाल-भात-तरकारीमा चटनी थपेर स्वादिलो बनाएको जस्तै” गरी प्रस्तुत गरेको बताए । यसअघि सार्वजनिक पोस्टरले पनि फिल्म थ्रिलर र हररको सङ्केत दिएको थियो । तर, फिल्मको गीत ‘चुच्चे ढुङ्गो’ भने प्रेमिल शैलीको छ, जसमा आर्यन सिग्देल र अञ्जना बराइलीको जोडी देख्न सकिन्छ ।
फिल्ममा अरुण लामा, प्रवीण खतिवडा, शिशिर बाङ्देल, प्रकाश घिमिरे, अञ्जना बराइली, राज पौडेल, कविता आले, नूतन, राज थापा, बिरेन्द्र सिंह कुशवाहा लगायतका कलाकारहरूको प्रमुख भूमिका रहेको छ । फिल्मका निर्माता दिनेश भट्टराई हुन् भने कार्यकारी निर्माता राज थापा रहेका छन् । फिल्मको स्क्रिप्ट डाक्टर मनोज पण्डित, मुख्य सहायक निर्देशक दिनेश बहादुर रावत, एक्सन निर्देशक राजु तामाङ, सङ्गीत राजनराज सिवाकोटी, कला निर्देशक रोशन दिवाना, सम्पादक मिलन श्रेष्ठ र रङ्ग संयोजक रेनीश फागो रहेका छन् ।
Discussion about this post