‘मितज्यू’बाट नेपाली फिल्ममा डेब्यु गर्दै लोकप्रिय डान्सर तेरिया फौजा मगर

इटहरी/ अभिनेता दयाहाङ राई र भारतीय रियालिटी शो ‘डान्स इण्डिया डान्स लिटिल मास्टर्स’की विजेता तेरिया फौजा मगर फिल्म ‘मितज्यू’मा अनुबन्ध भएकी छन् । यो फिल्मबाट उनले नेपाली फिल्ममा अभिनेत्रीको रुपमा डेब्यु गर्दैछिन् भने यो फिल्म ‘मितज्यू’ आगामी वर्षको चैत २७ गतेदेखि प्रदर्शन हुने भएको छ । अनिल बुढा मगरको निर्देशनमा यो फिल्म बन्दैछ । तेरियाले यसअघि भारतीय वेब सिरिज ‘उनकी यारी’ (२०२२) र ‘क्याम्पस बिट्स’ (२०२३) मा अभिनय गरिसकेकी थिइन् ।

तर, उनी नेपाली फिल्ममा देखिने चाहना दर्शकले सामाजिक सञ्जालमा धेरै व्यक्त गरिरहेका थिए । ‘मितज्यू’मार्फत उनी नेपाली फिल्ममा प्रवेश गरेपछि दर्शकहरूमा उत्सुकता थपिएको छ । जनक घर्ती मगरको लगानी रहने फिल्ममा दयाहाङ र तेरियाको जोडी देख्न पाइनेछ । दयाहाङले यसअघि जनककै लगानीमा बनेको सुपरहिट फिल्म ‘घरज्वाइँ’मा काम गरिसकेका छन् ।

गत असार २८ गते रिलिज भएको उक्त फिल्मले ५१ औं दिनसम्म प्रदर्शन भई राम्रो ब्यापार मात्र गरेन, समीक्षक तथा दर्शकबाट समेत सकारात्मक प्रतिक्रिया पाएको थियो । ‘मितज्यू’ जिएम मूभिज प्रोडक्सन र एबीएम सिने प्रोडक्सनको संयुक्त ब्यानरमा निर्माण हुनेछ । फिल्मको लेखन महेश राईले गरेका छन् भने प्रोडक्सन कन्ट्रोलर धन बहादुर राई छन् । मुख्य कलाकारहरूको घोषणा भइसके पनि अन्य कलाकारबारे निर्माण टिमले खुलाएको छैन । फिल्मको छायांकन अर्को वर्षबाट सुरु हुने बताइएको छ ।