इटहरी/ नयाँ नेपाली फिल्म ‘हेल्लो काशिराम’ले गुपचुप रूपमा निर्माण पूरा गरेपछि एकैसाथ फस्टलुक पोस्टर र प्रदर्शन मिति सार्वजनिक गरेको छ । निर्माण टिमका अनुसार यो फिल्म २०८२ जेठ २ गते रिलिज हुनेछ । सार्वजनिक पोस्टरले फिल्मप्रति दर्शकको उत्सुकता बढाएको छ । पोस्टरमा चर्चित अभिनेता दिलीप रायमाझी बोको बोकेर हिँडिरहेको देखिन्छ, जसले फिल्म हास्यप्रधान हुने संकेत गर्छ ।
हाल यो फिल्मको कथावस्तु गोप्य राखिएको छ, तर टिजर चाँडै सार्वजनिक गर्ने तयारी छ । फिल्ममा दिलीप रायमाझीसँगै सुरविर पण्डित, रामचन्द्र अधिकारी, शुशिल पोखरेल, उमेश राई (फुलन्देको आमा), भगेरी डन, नवज्योती रसाइली, सुमन खाँण, अजय न्यौपाने, सरोज केसी, उमेश मायालुको विशेष अभिनय रहेको छ । साथै, अभिनेत्री प्रियंका कार्की विशेष गेस्ट भूमिकामा रहनेछिन्, जसले फिल्मलाई थप आकर्षण दिने अपेक्षा गरिएको छ ।
रिम विश्वकर्माद्वारा लिखित तथा निर्देशित यो फिल्म रेडलाइन फिल्मस् प्रा.ली को ब्यानरमा निर्माण भएको हो । निर्माता पी.बी. थापा रहेको फिल्मको छायांकन यम आलेले गरेका हुन् । करिब डेढ करोडको लागतमा निर्माण भएको फिल्मको सम्पादन तथा रंग संयोजन मित्र डी. गुरुङले गरेका छन् । फिल्मको नृत्य निर्देशन कविराज गहतराज, द्वन्द्व निर्देशन शंकर महर्जन र संगीत संयोजन नरेन्द्र यिबोगी र विपिन आचार्यले गरेका छन् । गीतमा प्रताप दास, मेलिना राई, राजु परियार, किरण सुनार, अनिक गिरीको आवाज रहनेछ ।
चर्चित गायक-गायिकाहरूको सहभागिताले संगीतलाई थप आकर्षक बनाउने अपेक्षा गरिएको छ । फिल्मको प्रचार तथा अन्तर्राष्ट्रिय मिडिया म्यानेजमेन्टको जिम्मा सेलिब्रेटी टाइम्स प्रा.ली ले लिएको छ । नेपाल मात्र नभई विदेशमा रहेका नेपाली दर्शकमाझ समेत फिल्मको पहुँच पुर्याउन डिजिटल र पारम्परिक माध्यम प्रयोग गरिनेछ । निर्देशक रिम विश्वकर्माले फिल्मको प्रचार अभियान छिट्टै सुरु गर्ने जानकारी दिएका छन् ।
उनले यसअघि ‘नेपाली वीर’, ‘सम्झिराख है’, ‘रेलिमाई’ जस्ता चर्चित फिल्म निर्देशन गरिसकेका छन् । उनका फिल्महरू नेपाली मौलिक कथावस्तु, सामाजिक यथार्थता र मनोरञ्जनको संयोजनका कारण दर्शकमाझ रुचाइएका छन् । अब, ‘हेल्लो काशिराम’ ले दर्शकमाझ कस्तो प्रभाव पार्छ ? यो टिजर सार्वजनिक भएपछि थप प्रस्ट हुनेछ । फिल्मले मन जित्छ या असफल हुन्छ ? यसको उत्तर भने प्रदर्शनपछि मात्र थाहा हुनेछ ।
Discussion about this post