इटहरी/ वरिष्ठ अभिनेता हरिवंश आचार्यको बहुप्रतिक्षित फिल्म ‘भूठान’ वैशाख १२, २०८२ मा प्रदर्शन हुने तयारीमा छ । हलिउड अभिनेतासहितको यो विशेष प्रोजेक्टले हालै ‘कागजको खोस्टो’ बोलको मार्मिक गीत सार्वजनिक गरेको छ, जसले परदेशी मनको पीडा उजागर गर्छ । सार्वजनीक गीतमा पुष्पन प्रधानको स्वर, नवराज पराजुलीको शब्द र वाचन तथा रिदम कँडेलको संगीत संयोजन रहेको छ ।
सुनिल शिवभक्तिको सम्पादनमा तयार पारिएको यस गीतले घर फर्कन नपाएको पात्रको वेदना प्रस्तुत गरेको छ । “घर नफर्की मर्न पनि नमिल्ने, कालले समेत ताकेता गर्न नमिल्ने” भन्ने मार्मिक भावले गीतलाई अझ भावुक बनाएको छ । गीतको भिडियो नवराज पराजुलीको युट्युब च्यानलबाट सार्वजनिक गरिएको छ, जहाँ हरिवंश आचार्यको जीवन्त अभिनय र सुसन प्रजापतिको उत्कृष्ट छायांकन देख्न सकिन्छ ।
यसअघि सार्वजनिक भएको ‘भूठान’ को टिजरले फिल्मप्रेमीमा उत्सुकता जगाइसकेको छ । ‘द वर्ल्ड्स ह्याप्पिएस्ट म्यान’ शीर्षकअन्तर्गत अन्तर्राष्ट्रिय दर्शकलाई लक्षित गरिएको यस फिल्ममा हरिवंश आचार्यसँगै दयाहाङ राई, अनुराधा मजुमदार, पूजा चन्द-लामा, रिचा घिमिरे, जोयस पाण्डे, अदिति प्याकुरेल, टम क्रेन, विमल सुवेदी र हलिउड अभिनेता ब्रुस डर्नको पनि अभिनय छ । हेर्नुस् गीत ।
भूटान, नेपाल हुँदै अमेरिका पुगेका भूटानी समुदायको देशप्रेम, पहिचान र आफ्नो थातथलो छोड्नुपर्दाको पीडा ‘भूठान’ ले बयान गर्नेछ । हलिउडको ‘साग अफट्रा’ अन्तर्गत बनेको पहिलो नेपाली फिल्मको रूपमा यसले विशेष महत्व बोकेको छ । फिल्मका निर्देशक विनोद पौडेल हुन्, जसले ‘बुलबुल’ निर्देशन गरेर ख्याति कमाएका थिए । निर्मातामा अविरल थापा, सुशांक मैनाली, राजेन्द्र ठकुराठी, अमिताभ जोशी र किर्तना बाँस्कोटा छन्, भने कार्यकारी निर्मातामा विकास भिटो अधिकारी, कौशिला खनाल, रमेश भट्ट र अपार श्रेष्ठ छन् ।
फिल्ममा सुसन प्रजापतिको छायांकन, अन्जय खड्काको सम्पादन, डिकेश खडगी शाहीको ध्वनि, समवरण केमको संगीत, सुर्य शाहीको कास्टिङ, उज्ज्वल श्रेष्ठको पब्लिसिटी डिजाइन, विमल सुवेदीको प्रोडक्सन डिजाइन तथा बलिउडका चर्चित कला निर्देशक अन्जन गजुरेलको कला निर्देशन रहेको छ । ‘भूठान’ ठकुराठी ब्रोज, भ्याकेन्ट लाइट, एभरेस्ट इन्टरटेनमेन्ट, अवेकन प्रोडक्सन (नेपाल) र म्याड मंकी फिल्म्स (अमेरिका) को सहकार्यमा निर्माण भएको हो ।
Discussion about this post