इटहरी/ नेपालमा फागुन २९ गतेबाट प्रदर्शनमा आउन लागेको फिल्म ‘अन्जिला’को पहिलो नेपाली प्रीमियर धरानमा सम्पन्न भएको छ । नेपाली फिल्महरुको पहिलो प्रीमियर काठमाडौंमा गर्ने परम्परालाई तोड्दै निर्माण टिमले मोफसलमै रेड कार्पेटसहित ग्राण्ड प्रीमियर आयोजना गरेको हो । धरानस्थित फ्रेण्ड्स सिनेमाजमा सम्पन्न प्रीमियर कार्यक्रममा चलचित्रकर्मी, खेलाडी तथा स्थानीय व्यवसायीको उल्लेखनीय उपस्थिति देखियो ।
यसअघि हङकङ र बेलायतको एल्डरसटस्थित एम्पायर हलमा ग्राण्ड प्रीमियर गरिसकेको यस फिल्मलाई नेपालमै पहिलो पटक धरानमा भव्य रुपमा प्रीमियर गरिएको हो । हल विशेष रूपमा सजाइएका साथै रेड कार्पेट ओछ्याइएको थियो । यद्यपि, मुख्य अभिनेत्री अन्जिला तुम्बापो लिम्बु र अन्य प्रमुख कलाकार उपस्थित हुन सकेनन्, तर कलाकार प्रकाश सुब्बा र बालकलाकार नमिक्षा मगरले प्रीमियरमा सहभागिता जनाए ।
‘अन्जिला’ नेपाली महिला राष्ट्रिय फुटबल टिमकी कप्तान तथा गोलरक्षक एञ्जिला तुम्बाप्पोको जीवनमा आधारित बायोपिक फिल्म हो ।
फिल्म हेरेका दर्शक भावुक बनेका थिए, कतिपय हलमै रोएको दृश्यले फिल्मले गहिरो प्रभाव छोडेको संकेत गर्छ । फिल्मकर्मीहरुले अन्जिलाको अभिनयको खुलेर प्रशंसा गरे । निर्देशक मिलन चाम्सका अन्य फिल्महरूमध्ये ‘अन्जिला’ उत्कृष्ट रहेको प्रतिक्रिया समेत दिए । बालकलाकार नमिक्षा मगरले फिल्म हेर्दा अन्जिला दिदीको संघर्ष देखेर आँसु थाम्न नसकेको बताइन् । प्रीमियर कार्यक्रममा निर्माता तथा कलाकार प्रेम कुमार श्रेष्ठ, सह-निर्माता विनोद अग्रवाल, राजेश बगडिया, र निर्देशक मिलन चाम्स समेत उपस्थित थिए ।
दर्शकको सकारात्मक प्रतिक्रिया पाएपछि निर्माता श्रेष्ठ भावुक बने । उनले हङकङ, युके र कोरियामा फिल्म अत्यधिक रुचाइएकाले नेपालमा पनि राम्रो प्रतिक्रिया आउनेमा विश्वस्त रहेको बताए । निर्देशक मिलन चाम्सको तेस्रो बायोपिक फिल्मका रूपमा ‘अन्जिला’ लाई लिइएको छ । यसअघि उनले ‘ब्लाइन्ड रक्स’ र ‘बबी’ निर्देशन गरिसकेका छन् । इलामको आइतबारे, झापा र काठमाडौंमा छायांकन गरिएको यो फिल्मले अन्जिलाको संघर्ष र सफलताको कथा प्रस्तुत गर्छ ।
इच्छाशक्ति भए असम्भव केही छैन भन्ने प्रेरणादायी सन्देश बोकेको फिल्ममा अन्जिलाका साथै दयाहाङ राई, सिर्जना सुब्बा, माओत्से गुरुङ, बुद्धि तामाङ, विजय बराल लगायतका कलाकारको अभिनय छ । ‘अन्जिला’ मुन लभ इन्टरटेन्मेन्टको ब्यानरमा निर्माण भएको फिल्म हो । प्रेम कुमार श्रेष्ठ निर्माता तथा प्रमुख अभिनेता हुन् भने विनोद अग्रवाल र राजेश बगडिया सह-निर्माता छन् । सिनेमाटोग्राफी सुदीप बरालले गरेका छन् भने सम्पादन मिलन श्रेष्ठले गरेका छन् ।
Discussion about this post