इटहरीमा ‘इण्टरनेशनल पिपुल्स थिएटर फेष्टिवल’ सुरु, यी हुन् आज मञ्चन गरिने नाटकहरू

इटहरी/ कोशी प्रदेशको पर्यटन वर्ष–२०८१ को अवसरमा इटहरीमा ‘इण्टरनेशनल पिपुल्स थिएटर फेष्टिवल–२०२५’ आयोजना सुरू भएको छ । एशियन पिपुल्स थिएटर फेष्टिवल सोसाइटी र सर्वनाम थिएटरको सहकार्यमा यही फागुन २३ गते शुक्रबार देखि महोत्सव सुरु भएको हो । २५ गतेसम्म आयोजना हुने महोत्सव उद्घाटन समारोहको प्रमुख अतिथिको रुपमा कोशी प्रदेशका मुख्यमन्त्री हिक्मत कुमार कार्की रहेका थिए ।

इटहरी म्याट्रिक्स परिसरस्थित नव निर्मित सांस्कृतिक भवन (थिएटर हल) मा यो महोत्सव सुरु भएको हो । काठमाडौं, इटहरी र धनकुटामा आयोजना हुने यस महोत्सवमा १३ भन्दा बढी राष्ट्रका थिएटर समूहका ४४ जना विदेशी रंगकर्मी तथा संस्कृतिकर्मीको सहभागिता रहनेछ । विभिन्न नाटक प्रदर्शन, कार्यशाला तथा सांस्कृतिक आदान–प्रदानका गतिविधिहरू समेटिएको यो महोत्सवले कोशी प्रदेशको पर्यटन प्रवद्र्धन, अन्तर्राष्ट्रिय सम्बन्ध विस्तार तथा कला, संस्कृति र सभ्यताको अभिवृद्धिमा योगदान पुग्ने अपेक्षा गरिएको छ ।

कोशी प्रदेशमै पहिलो पटक आयोजना सुरू भएको अन्तराष्ट्रिय नाटक महोत्सवको स्थानीय मूल संयोजन इटहरी म्याट्रिक्स र आरम्भ नाट्य डबलीले गरिरहेका छन् । साथै, कोशी प्रदेशका विभिन्न जिल्लामा क्रियाशील २० भन्दा बढी रंगसंस्थाहरूको सहकार्य रहेको छ । महोत्सवअन्तर्गत विदेशी नाटक प्रदर्शनसँगै स्थानीय प्रस्तुति तथा रंगमञ्चसम्बन्धी कार्यशालाहरू आयोजना गरिनेछ । फागुन २३ गते उद्घाटन पश्चात अरण्यक नाट्य दलले ‘टुम्बा एण्ड नेभर’, ड्रामा बक्सले ‘सिक्स माइक्रो लेक्चर्स अन जेनोसाइड’ र म्याट्रिक्सले ‘भ्रूण’ नामक नाटक मञ्चन गरेको थियो भने स्थानीय तथा विदेशी कलाकारबीच संवाद समेत भएको थियो ।

यस्तै आज फागुन २४ गते बिहान ८ बजेदेखि १० बजेसम्म साउथ कोरियाको नामोदाक मुभमेन्ट ल्याबले नाट्य कार्यशाला गर्नेछ । त्यस्तै १२ बजेदेखि २ बजेसम्म नाट्य चेतना, भारतले नाट्य कार्यशाला गर्नेछ भने साँझ ५:३० देखि ७:३० बजेसम्म ३ ओटा नाटक मञ्चन गरिनेछ । यो समयमा आर्ट फर अलले ‘टुडो’, ग्रास स्टेज थियटरले ‘बियोन्ड होप एण्ड डिस्पेयर’ र नटसुको किरिटानीले ‘द ट्रान्स बोर्डर’ नामक नाटक मञ्चन गर्नेछन् ।

महोत्सवको अन्तिम दिन अर्थात् भोलि फागुन २५ गते ‘डिसेप्सन अफ द डेमोन’ अनत्त थियटर ट्रुप, ‘इट ओण्ट बी लङ नाउ’ इण्डी ली र स्थानीय प्रस्तुति रहने आयोजकले जनाएको छ । यो महोत्सवले नेपाललाई अन्तर्राष्ट्रिय नाट्य मंचमा स्थापित गर्न योगदान पुग्ने विश्वास लिइएको छ । आयोजकहरूले यसलाई नेपालमा अन्तर्राष्ट्रिय रंगमञ्च संस्कृतिको प्रवर्द्धन गर्ने एउटा महत्वपूर्ण अवसरका रूपमा लिएका छन् ।