इटहरी/ धरानस्थित बुढासुब्बा मन्दिरको प्राङ्गणमा एक कार्यक्रमको आयोजना गर्दै ‘पहिचान’ फिल्मको शुभ मुहूर्त गरिएको छ । कार्यक्रममा फिल्म क्षेत्रका हस्तीहरुको उपस्थीती रहेको थियो । मुहूर्त कार्यक्रममा पत्रकार महासंघ सुनसरीका अध्यक्ष सन्तोष काफ्लेले नरिवल फुटाएर शुभारम्भ गरे भने याक्थुङ चलचित्रकर्मी संघका अध्यक्ष नवीन मेयाङबोले क्ल्याप हानेका थिए ।
यस्तै नेपाल चलचित्रकर्मी महासंघ कोशी प्रदेशका अध्यक्ष अरुण कुमार प्रधानले एक्सन कट दिएका थिए । फिल्मका मुख्य कलाकार धिरेन शाक्य र करिश्मा मानन्धरले मुहूर्त सट दिएका थिए । भीम लामाको निर्देशनमा निर्माण हुन लागेको यो फिल्म ‘पहिचान’को छायांकन पूर्वी नेपालका विभिन्न स्थानमा गरिने बताइएको छ । कार्यक्रमका प्रमुख अतिथिकाे रुपमा रहेका अध्यक्ष प्रधानले यो फिल्मले पूर्वी संस्कृतिलाई उजागर गर्ने विश्वास व्यक्त गरे ।
अभिनेता धिरेन शाक्यले फिल्म ‘पहिचान’मा लामो समयदेखि जोडिएको बताउँदै उत्कृष्ट नतिजाका लागि सम्पूर्ण टिमले मेहनत गर्ने बताए । अभिनेत्री करिश्मा मानन्धरले यो फिल्ममार्फत पूर्वेली दर्शकहरूसँग प्रत्यक्ष साक्षात्कार गर्ने अवसर मिलेको उल्लेख गरिन् ।
फिल्मका निर्देशक भीम लामाले ‘पहिचान’ लाई ऐतिहासिक फिल्म बनाउन कुनै कसर बाँकी नराख्ने प्रतिबद्धता जनाए । उनका अनुसार कथा लेखनदेखि कलाकार छनोटसम्म पूर्ण गम्भीरता अपनाइएको छ । कथाले मागेअनुसारकै कलाकार छनोट गरिएको उनले बताए । फिल्ममा धिरेन शाक्य र करिश्मा मानन्धरका अलावा राजेन्द्र खड्गी, प्रेम सुब्बा, सुरवीर पण्डित, प्रशान्त तामाङ, किशोर सम्बाहाम्फे, रामजी बिष्ट, रोशन शर्मा, शर्मिला राई, नव नायिका जेनि घिसिङ लगायतको अभिनय रहनेछ ।
भीम लामा फिल्म्स प्रा.लि.को ब्यानरमा निर्माण हुन लागेको ‘पहिचान’को निर्माण टिममा भीम लामा, रामजी बिष्ट, छिरिङ लामा, उमेश तामाङ रहेका छन् । निर्देशक भीम लामाले यसअघि ‘माटो’, ‘भेडीगोठ’ जस्ता फिल्म निर्माण गरिसकेका छन् भने ‘फेक फ्रेन्ड’, ‘गोल’, ‘सरप्राईज’, ‘नासो’, ‘लिलामे माईला’ निर्देशन गरेका छन् ।
Discussion about this post