भदौ १० गते रिलिज हुने ‘जनै हराएको बाहुन’मा केकी अधिकारी र मिरुना मगर अनुबन्ध

इटहरी/ हरितालिका तीजको अवसर पारेर आगामी भदौ १० गते रिलिज हुने फिल्म ‘जनै हराएको बाहुन’ मा केकी अधिकारी र मिरुना मगर प्रमुख भूमिकामा अनुबन्ध भएका छन् । निर्माण टोलीले यसअघि नै अभिनेता विजय बराल, गौरव पहाडी र रियर राईलाई फाइनल गरिसकेको थियो । यो फिल्मले आमा-छोराको भावनात्मक कथा प्रस्तुत गर्नेछ, जसमा आमाको सुखका लागि छोराले गर्ने संघर्षलाई मुख्य विषयवस्तु बनाइएको छ ।

केही समयअघि सार्वजनिक गरिएको थिम मोसन पोस्टरमार्फत यस कथालाई संकेत गरिएको थियो । हिमाल न्यौपानेको डेब्यु निर्देशन रहने ‘जनै हराएको बाहुन’ मा असोसियट निर्देशकका रूपमा ‘प्रेमगीत ३’ का अभिनेता मनिष राउत जोडिएका छन् । फिल्मको कथा, पटकथा र संवाद भानुभक्त ढकालले लेखेका हुन् ।

गाउँबाट सहर आएका एक व्यक्तिले भोग्नुपरेका चुनौती र त्यसले ल्याउने परिवर्तनको कथा फिल्मले प्रस्तुत गर्नेछ । पेपरक्लिप प्रालिको ब्यानरमा निर्माण हुने यो फिल्ममा आदित्य फिल्म्स निर्माता रहेको छ । नवीन गुरुङ छायाँकार, सम्राट महर्जन (ज्याक) क्रियटिभ निर्देशक तथा मयंक निरौला भिएफएक्स सुपरभाइजरका रूपमा संलग्न छन् । यो वर्ष २०८१ को अन्त्यसम्म छायांकनमा जाने योजनासहित निर्माण पक्षले नेपाल र ओभरसिज मार्केटमा एकैदिन फिल्म प्रदर्शन गर्ने तयारी गरेको छ ।