यस्तो छ मधेश आन्दोलनको कथा बोकेको फिल्म ‘राजागंज’को ट्रेलर

इटहरी/ मधेश आन्दोलनका संवेदनशील पक्षलाई उठान गर्दै निर्देशक दीपक रौनियारले निर्देशन गरेको फिल्म ‘राजागंज’को ट्रेलर सार्वजनिक गरिएको छ । सोमबार काठमाडौंमा आयोजित कार्यक्रममा सार्वजनिक गरिएको तीन मिनेट लामो ट्रेलरले २०७२ सालमा संविधान जारी भएपछि मधेशमा भड्किएको आन्दोलनको कथालाई प्रस्तुत गरेको छ । ट्रेलरमा आन्दोलनका बीच अपहरणमा परेका एक सभासद् र एक प्रधानाध्यापकका छोरालाई बचाउन प्रहरीले सञ्चालन गरेको अप्रेसन देखाइएको छ ।

प्रहरी इन्स्पेक्टरको भूमिकामा देखिएकी अभिनेत्री आशा मगराती र प्रहरी रणनीतिको सामना गरिरहेका दयाहाङ राई को टकरावले कथालाई थप रोमाञ्चक बनाएको छ । ट्रेलरले आन्दोलनको जटिलता, प्रहरी अनुसन्धान र राजनीतिक परिस्थितिलाई यथार्थपरक रूपमा चित्रण गरेको छ । ट्रेलर सार्वजनिक कार्यक्रममा निर्देशक रौनियारले ‘राजागंज’ आफ्नो अहिलेसम्मकै ठूलो प्रोजेक्ट भएको बताए । उनका अनुसार फिल्ममा एक हजारभन्दा बढी मानिस संलग्न छन् र यसलाई सन् २०१५ को मधेश आन्दोलनको वास्तविक परिदृश्यमा आधारित राखेर निर्माण गरिएको छ । हेर्नुस् ट्रेलर ।

अन्तर्राष्ट्रिय महोत्सवहरूमा राम्रो प्रतिक्रिया पाएको यस फिल्मलाई नेपाली दर्शकले पनि मन पराउने विश्वास उनले व्यक्त गरे । आगामी चैत १ गते प्रदर्शनमा आउने फिल्ममा दयाहाङ राई, आशा मगराती, विजय बराल, ऋचा शर्मा, पशुपति राई, पूर्व मिस नेपाल निकिता चाण्डक, गौमाया गुरुङ, पुष्पा यादव, आरती मण्डल, घनश्याम मिश्र, परमेश्वर कुमार झा, नीरज श्रेष्ठ लगायतका कलाकारको अभिनय रहेको छ ।

यो फिल्मले भेनिस, ह्याम्बर्ग, बुसान र मुम्बईजस्ता ठूला अन्तर्राष्ट्रिय फिल्म महोत्सवहरूमा प्रदर्शन भई प्रशंसा बटुलिसकेको छ । भेनिस फिल्म फेस्टिभलमा १० मिनेटसम्म स्ट्यान्डिङ ओभेसन पाएको यो फिल्म कात्तिक महिनामै पाँच वटा फेस्टिभलमा देखाइएको थियो । निर्देशक रौनियारलाई अमेरिकी पत्रिका ‘द न्युयोर्क टाइम्स’ ले विश्वका ९ उदीयमान निर्देशकहरू को सूचीमा समावेश गरिसकेको छ ।

त्यस्तै, चर्चित ब्राजिलियन लेखक पाओलो कोहेलोले समेत सार्वजनिक रूपमा उनको प्रशंसा गरेका थिए । फिल्मको निर्माणमा आदि फिल्मस्का तर्फबाट निर्देशक रौनियार र अभिनेत्री मगराती, बासुरी फिल्मस्का तर्फबाट रामबाबु गुरुङ र मनिराम पोखरेल, अभिनेता दयाहाङ राई तथा तन्हाउसर गेट तर्फबाट एलन आर मिलिगनको सहकार्य रहेको छ । नेपालमा यसलाई टिफल्क र ब्यांकटेश इन्टरटेनमेन्टले संयुक्त रूपमा वितरण गर्ने भएका छन् ।