इटहरी/ चितवनमा निर्माणाधीन गौतमबुद्ध अन्तर्राष्ट्रिय रंगशालासँग जोडिएको आर्थिक विवादले नयाँ मोड लिएको छ । कलाकार तथा सामाजिक अभियन्ता सीताराम कट्टेल ‘धुर्मुस’ र कुञ्जना घिमिरे ‘सुन्तली’विरुद्ध पञ्चकन्या स्टिलले ५२ लाख २ हजार ५ सय ५५ रुपैयाँ बक्यौता रहेको दाबी गर्दै जिल्ला अदालत ललितपुरमा मुद्दा दायर गरेको छ । धुर्मुस-सुन्तली फाउन्डेसनले रंगशाला निर्माणका लागि उक्त कम्पनीबाट पटक-पटक छड लिएको तर त्यसको भुक्तानी नगरेको भन्दै मुद्दा दायर गरिएको हो ।
स्रोतका अनुसार उनीहरूविरुद्ध लेनदेन कसुरमा देवानी मुद्दा अघि बढाइएको छ । २०७५ माघ १६ गते धुर्मुस-सुन्तलीले चन्दा संकलनमार्फत रंगशाला निर्माणको घोषणा गरेका थिए । भरतपुर महानगरपालिकासहित सरकारी निकायहरूसँग सम्झौता गरी निर्माण कार्य अघि बढाइएको थियो । पूर्वप्रधानमन्त्री पुष्पकमल दाहाल ‘प्रचण्ड’, कांग्रेस नेता डा. शशांक कोइराला, पूर्वअर्थमन्त्री सुरेन्द्र पाण्डेसहित ११ जनाको रोहबरमा महानगर र फाउन्डेसनबीच स्वामित्व हस्तान्तरणका लागि सम्झौता भएको थियो ।
सम्झौताअनुसार, स्रोत अपुग भएमा आपसी सहमतिमा रकम जुटाएर निर्माण सम्पन्न गर्ने दायित्व दुवै पक्षको थियो । तर, कोरोना महामारीका कारण रंगशाला निर्माण प्रभावित भयो । वित्तीय कठिनाइका कारण फाउन्डेसनले २०७८ माघ २० गते रंगशालाको स्वामित्व भरतपुर महानगरलाई हस्तान्तरण गर्यो । तर, तीन वर्ष बितिसक्दा पनि १ सय ३६ कम्पनीहरूलाई भुक्तानी गर्नुपर्ने १८ करोड ४३ लाख रुपैयाँ तिर्न सकेको छैन् ।
यस विषयमा सीताराम कट्टेलले भरतपुर महानगरपालिकालाई स्वामित्व हस्तान्तरण गर्दा ऋणको जिम्मेवारी समेत सुम्पिएको दाबी गरेका छन् । “स्वामित्व दिएपछि महानगरले ऋण तिर्नुपर्ने हो, तर भुक्तानी नहुँदा तनाव मैले बोकेको छु । अहिले दैनिक सिंहदरबार धाएर सरकारलाई ऋण तिर्न अनुरोध गरिरहेको छु,” उनले भने । २०७९ चैत २० गते बसेको मन्त्रिपरिषद् बैठकले रंगशालाको स्वामित्व लिएर निर्माण अघि बढाउने निर्णय गरिसकेको छ । हाल ग्लोबल टेन्डरमार्फत हिमालयन कालिञ्चोक बीबीआर जेभी कम्पनीले निर्माण कार्यलाई अघि बढाइरहेको छ ।
Discussion about this post