‘फेरि रेशम फिलिली’को उत्कृष्ट वर्ड अफ माउथ, शनिवार दर्शक बढे

इटहरी/ महाशिवरात्रिको अवसर पारेर फागुन १४ गते बाट प्रदर्शनमा आएको फिल्म ‘फेरि रेशम फिलिली’ ले उत्कृष्ट वर्ड अफ माउथ पाइरहेको छ । पहिलो दिन नै राम्रो अकुपेन्सी प्राप्त गरेको फिल्मले दर्शकको सकारात्मक प्रतिक्रिया बटुलिरहेको छ । फिल्मका कलाकारहरू दर्शकमाझ पुगेर साक्षात्कार गरिरहेका छन् । हलमा पुगेका दर्शकहरूले कलाकारहरूसँग सेल्फी खिच्नुका साथै ‘फेरि जालमा’ गीतमा नृत्य गर्दै रमाइलो गरेका छन् । कथावस्तु र सन्देश मन परेको भन्दै धेरैले सिनेमाको तारिफ गरेका छन् ।

निर्देशक निरोज महर्जनले दर्शक र समीक्षकबाट अत्यन्त सकारात्मक प्रतिक्रिया प्राप्त भएको बताए । “फिल्मबाट दर्शकलाई मनोरञ्जन दिन खोजिएको थियो र त्यो उद्देश्य सफल भएको देख्दा उत्साह थपिएको छ,” उनले भने । फिल्मका मुख्य अभिनेता विनय श्रेष्ठले सुरुवाती दुई दिन वार्मअप जस्तो भएको बताए । “विकेन्डमा दर्शकले फिल्मलाई अझ बढी फिलिली बनाउनेछन्,” उनको भनाइ छ । जसअनुरुप कोशी प्रदेशमा पनि केही शो हरुमा दर्शकको सुरुवाती दिन भन्दा राम्रो उपस्थीती देखिएको छ ।

अर्का अभिनेता कामेश्वर चौरासिया (हरिया) ले दर्शक संख्या विस्तारै बढ्ने अपेक्षा व्यक्त गर्दै “वर्ड अफ माउथकै कारण शनिबार हलहरूमा दर्शकको चाप बढेको हो” भने। मुख्य अभिनेत्री सुपुष्पा भट्टले आफ्नो अभिनयलाई दर्शकले राम्रो प्रतिक्रिया दिइरहेकोमा खुशी व्यक्त गरिन् । “अघिल्ला फिल्मको तुलनामा मेरो अभिनयमा सुधार आएको दर्शकले बताइरहनुभएको छ,” उनले भनिन् ।

यो फिल्ममा विनय श्रेष्ठ, सुपुष्पा भट्ट, कामेश्वर चौरासिया, नीर शाह, प्रकाश घिमिरे, शिशिर वाङ्देल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, प्रकाश दाहाल, सजन थापा लगायतका कलाकारको अभिनय रहेको छ । सुसन प्रजापतीको छायांकन, निरोज महर्जन र आकाश बरालको पटकथा, नरेश किङ्ग योगीको द्वन्द्व निर्देशन, कालीप्रसाद बाँस्कोटा, एसडी योगी, हर्क साउद, जयन जे वाइवा र दीपक शर्माको संगीत तथा सुरेन्द्र पौडेलको सम्पादन रहेको छ ।

सिनेमा आर्ट्स र वि मोसन पिक्चर्सको सहकार्यमा निर्माण भएको फिल्मका निर्माता रौनक विक्रम कडेल, कार्यकारी निर्माता सुरज बम ठकुरी र सह-निर्मात्री एनि थापा हुन् । गोविन्द शाहीको काफिया फिल्म्स र कुवेर सिने डिस्ट्रीब्युसनले फिल्मलाई वितरण गरिरहेको छ ।