फरक एक्सन, दमदार संवादसहित फिल्म ‘आउटलः दफा २१९’ को ट्रेलर रिलज

इटहरी/ यही फागुन २९ गतेबाट सार्वजनीक प्रदर्शनमा आउने ‘आउटलः दफा २१९’ को ट्रेलर सार्वजनिक भएसँगै फिल्मको एक्सन, कथावस्तु र दमदार संवादले चर्चा बटुल्न थालेको छ । सुशिल श्रेष्ठको शक्तिशाली एक्सन अवतार देख्न सकिने यो फिल्म विक्की महर्जनको लेखन तथा निर्देशनमा तयार भएको हो भने अमित अग्रहरि र नीशा गुइडेले निर्माण गरेका हुन् ।

फिल्ममा विक्की महर्जन र विनोद कठायतको पटकथा तथा नवीन गुरुङको सिनेमाटोग्राफी रहेको छ । विकास चौधरी सह-निर्माताको रूपमा छन् भने कार्यकारी निर्माताको जिम्मेवारी विनोद कठायतले सम्हालेका छन् । सार्वजनीक ट्रेलरको सम्पादन साहिल खानले गरेका छन्, भने चुल्ठे काजीको एक्सन निर्देशनले फिल्मलाई झनै उत्कृष्ठ बनाएको छ । हेर्नुस् ट्रेलर ।

फिल्ममा सुशिल श्रेष्ठका अलावा शिक्षा संग्रौला, नरेश पौडेल, सुमन भण्डारी, हेम महर्जन, सोनी लागुन, विशाल पहारी, महेश त्रिपाठी, मारिया कार्की र अयान परियारको अभिनय रहेको छ । विशेषगरी, यो फिल्मबाट सुशिललाई ‘एक्सन स्टार’ को रूपमा प्रस्तुत गरिएको छ, जसमा उनको लुक्स, स्टाइल र फाइट सिक्वेन्स निकै प्रभावशाली देखिन्छ ।

ट्रेलरका केही संवादहरू दर्शकमाझ हिट हुने सम्भावना छ । “यहाँ व्वासोहरु झुण्डमा हिँडेर आफूलाई वाघ ठान्छन् । तर, वाघलाई के थाहा ? वाघ एक्लै आउँछ र एक्लै शिकार गर्छ ।” जस्तो संवादले कथाको वजन थपेको छ । त्यस्तै, “हिजोसम्म स्यालको सरकार देखेकी थिइस्, आज बाघको सरकार देखिस् ।” भन्ने संवादले पनि दर्शकलाई लोभ्याउनेछ । नेपालमा अहिले एक्सन प्रधान फिल्मलाई रुचाइएको छ । फरक शैलीको एक्सन र न्यायको कथामा बनेको ‘आउटलः दफा २१९’ ले पनि दर्शकको साथ पाउने विश्वास गर्न सकिन्छ ।