‘अञ्जिला’को ट्रेलर सार्वजनिक, खेलाडीको रियल स्टोरी फिल्ममा आउँदै

इटहरी/ नेपाली महिला फुटबल टिमकी कप्तान तथा नम्बर एक गोलरक्षक एन्जिला तुम्बापो सुब्बाको संघर्ष र फुटबलप्रतिको मोहलाई पर्दामा उतारिएको फिल्म ‘अञ्जिला’ को ट्रेलर सार्वजनिक भएको छ । आगामी फागुन २९ गते प्रदर्शनमा आउने यस फिल्मले नेपाली फिल्ममा खेलकुद-आधारित कथावस्तुलाई बल दिने अपेक्षा गरिएको छ ।

काठमाडौंमा आयोजित ट्रेलर सार्वजनिक कार्यक्रममा फिल्मका मुख्य कलाकार एन्जिलासँगै अभिनेता दयाहाङ राई, कलाकार सुमिन गुरुङ, निर्माता तथा कलाकार प्रेम कुमार श्रेष्ठ, निर्देशक मिलन चाम्सलगायतको उपस्थिति थियो । कार्यक्रममा निर्देशक चाम्सले यस फिल्ममा अधिकांश राष्ट्रिय खेलाडीहरूको संलग्नता रहेको भन्दै गैर-कलाकारलाई अभिनय गराउनु चुनौतीपूर्ण रहेको बताए । उनले अभिनेता दयाहाङ राईलाई दुई वर्ष पर्खेर फिल्ममा ल्याएको खुलासा गर्दै, दर्शकहरूले फिल्म हेर्न आउनुअघि ट्रेलरबाट केही संकेतहरू लिन सक्ने बताए । हेर्नुस् ट्रेलर।

फिल्मका निर्माता तथा कलाकार प्रेमकुमार श्रेष्ठका अनुसार ‘अञ्जिला’ फुटबलको मात्र कथा नभई, मुख्य पात्रको जीवन संघर्षलाई प्राथमिकतामा राखेर निर्माण गरिएको फिल्म हो । अभिनेता दयाहाङ राईले आफू नेपाली खेलहरूको ठुलो समर्थक रहेको बताउँदै भने, “महिला फुटबल टोलीको कथा पर्दामा आउँदैछ भन्ने थाहा पाएपछि भूमिका थाहा नपाउँदै काम गर्न सहमत भएँ । म यो अनुभवका लागि सधैं ऋणी रहनेछु।”

कार्यक्रममा एन्जिलाले निर्देशक मिलन चाम्सलाई आफ्नो मार्गदर्शकका रूपमा स्वीकार्दै भनिन्, “पहिला डराउँथेँ, तर अहिले उहाँ आफ्नै दाइजस्तो लाग्छ । मेरो कथा उहाँहरूकै जिम्मामा छोड्दैछु ।” उनले निर्माता प्रेम कुमार श्रेष्ठलाई ‘गडफादर’ को रूपमा सम्मान गर्दै भनिन्, “म आज जुन ठाउँमा छु, उहाँकै कारण छु । यो फिल्मले नेपाली खेलाडीहरूको कथालाई ठूलो पर्दामा उतार्ने नयाँ बाटो खोलेको छ।”

फिल्ममा सुनिल थापा, विजय बराल, सिर्जना सुब्बा, माओत्से गुरुङ, बुद्धि तामाङलगायतका कलाकारहरूले पनि अभिनय गरेका छन् । एन्जिलाको जन्मथलो इलामको आइतबारे, झापा, र काठमाडौंमा छायांकन सम्पन्न भएको यो फिल्मलाई सुदीप बरालले खिचेका हुन् भने सम्पादन मिलन श्रेष्ठले गरेका छन् । ‘अञ्जिला’ मुन लभ इन्टरटेन्मेन्टको ब्यानरमा निर्माण भएको हो । फिल्मका निर्माता प्रेम कुमार श्रेष्ठ हुन् भने टुबेन्द्र लिम्बु, विनोद अग्रवाल र राजेश बगडिया सह-निर्माताका रूपमा रहेका छन् । निर्माण नियन्त्रकको भूमिका विनोद सुवेदी खत्रीले निर्वाह गरेका छन् ।