‘धुन्धुकारी’बाट ‘शिव’सम्म: आशिष घिमिरेको ‘होस्टेल ३’ यात्रा

इटहरी/ नेपाली फिल्म क्षेत्रमा अहिले ‘होस्टेल ३’ को चर्चा चुलिएको छ । फागुन २३ गते प्रदर्शनमा आउन लागेको यो फिल्मको ट्रेलरले नेपालसहित भारत र करिब २० देशमा युट्युब ट्रेन्डिङ कब्जा गरेपछि अझै ठूलो चर्चा पाएको छ । फिल्ममा पारस बम (कूलब्वाय), आशिष घिमिरे (धुन्धुकारी), पदम तामाङ, रिहान गिरी, सिम्रन पन्त, हेना नगरकोटी, समा पराजुली, सन्तोष बानियाँ, उमर खान, रोहन श्रेष्ठ लगायतका कलाकारको प्रमुख भूमिका छ ।

विशेष कुरा के छ भने, यी सबै कलाकारहरूको लागि ‘होस्टेल ३’ पहिलो डेब्यू फिल्म हो । डेढ वर्षकै उमेरमा ‘गीताञ्जली’ सिरियलबाट अभिनय यात्रा सुरु गरेका आशिष घिमिरेले ६ वर्षको उमेरमा ‘मेरी बास्सै’ मा ‘धुन्धुकारी’ को भूमिका निभाउँदै पाँच वर्षसम्म दर्शकलाई हसाए । त्यसपछि उनले ‘सिग्नेचर’ फिल्ममा सन्दिप क्षेत्रीको बाल्यकालको भूमिका निभाए भने, ‘जुरेली’ सिरियलमा पनि अभिनय गरे ।

अभिनयसँगै अध्ययनलाई प्राथमिकता दिएका उनले प्लस २ पछि ‘आइटी’ मा ब्याचलर सके । अध्ययनकै क्रममा उनले केही वेब सिरिज र म्यूजिक भिडियोमा सहायक निर्देशन तथा लेखनमा अनुभव सँगाले । ब्याचलर पूरा गरेपछि उनले सुनिल पोखरेलसँग आरोहण गुरुकुलमा अभिनय सिके र ‘गच्छामि’ तथा ‘काल’ जस्ता नाटकमा काम गरे । यता फिल्म निर्माण टोली ‘शिव’ नामक भूमिकाको लागि उपयुक्त कलाकार खोज्दै थियो । अडिसनका क्रममा आशिषलाई स्क्रिप्ट दिइयो ।

पटक-पटक अडिसन दिएपछि उनको अभिनय क्षमता देखेर निर्माण टोलीले उनलाई ‘शिव’ को भूमिकामा फाइनल गर्यो, जसको पुष्टि निर्देशक सशान कँडेलले गरेका छन् । यो फिल्मको लेखन तथा एसोसियट निर्देशन माधव शर्माले गरेका छन् । निर्माता सुरेश कँडेल, कर्ण कार्की र गोविन्द अधिकारी हुन् भने सह-निर्मातामा शिशिर ज्ञवाली, अनीश सिग्देल, कुन्दन गुप्ता र गणेश मगर छन् ।

कार्यकारी निर्माता शङ्कर कोइराला हुन् भने लाइन प्रोड्यूसर कोसिस राज क्षेत्री रहेका छन् । फिल्मको छायाङ्कन अर्जुन तिवारी, सम्पादन विकास दाहाल, एक्सन निर्देशन हिमाल केसी, सङ्गीत अर्जुन पोखरेल, अल्मोडा राणा उप्रेती, महेश ज्ञवाली र किरण माइकल, तथा नृत्य निर्देशन प्रवीण सिंह र रोशन विश्वकर्माले गरेका छन् । फिल्मको वितरण काठमाडौं उपत्यकामा काफिया फिल्म्स (गोविन्द शाही) ले गर्नेछ भने उपत्यका बाहिर आरआर फिल्म्स (रोहित कट्टेल, रत्न श्रेष्ठ) ले जिम्मेवारी लिनेछन् ।