फिल्म ‘फेरि रेशम फिलिली’को अग्रीम टिकट बुकिङ खुल्यो

इटहरी/ ९ वर्षपछि पर्दामा फर्किन लागेको ‘रेशम फिलिली’को दोश्रो शृङ्खला ‘फेरि रेशम फिलिली’ले प्रदर्शनअघि नै उत्साहजनक संकेत देखाएको छ । बुकिङ खुल्नासाथ, फिल्मले देशभर ८६ शो प्राप्त गरिसकेको छ, जुन प्रतिस्पर्धी फिल्मको बीचमा पनि उल्लेखनीय मानिन्छ । फागुन १४ गते महाशिवरात्रिको अवसर पारेर प्रदर्शन हुन लागेको फिल्मले काठमाडौं उपत्यकामा ४६ शो तथा बाहिरी सहरहरूमा ४० शो पाएको छ ।

उपलब्ध तथ्यांकअनुसार, हलहरूको संख्या थपिँदै गएपछि ‘फेरि रेशम फिलिली’ ले १५० भन्दा बढी शो पाउने सम्भावना छ । २०७२ सालमा प्रदर्शन भएको ‘रेशम फिलिली’ ले ओपनिङ दिनमै राम्रो व्यापार गरेको थियो । तर, भोलिपल्ट आएको विनाशकारी भूकम्पका कारण यसको प्रदर्शन रोकिएको थियो । पुनः प्रदर्शनपछि पनि फिल्मलाई सकारात्मक प्रतिक्रिया मिलेको थियो ।

सिक्वेलमा मुख्य पात्र रेशमले अमेरिकाको भिसा पाएपछि उत्पन्न हुने परिस्थितिको कथा प्रस्तुत गरिएको छ, जसले दर्शकमाझ थप कौतुहलता बढाएको छ । फिल्ममा विनय श्रेष्ठ, सुपुष्प भट्ट, कामेश्वर चौरासिया, नीर शाह, प्रकाश घिमिरे, शिशिर वाङ्देल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, सजन थापा लगायतका कलाकारहरूको अभिनय रहेको छ ।

निरोज महर्जन निर्देशित फिल्मको छायांकन सुसन प्रजापती, पटकथा निरोज महर्जन र आकाश बराल, द्वन्द्व निर्देशन नरेश किङ्ग योगी, संगीत कालीप्रसाद बाँस्कोटा, एसडी योगी, हर्क साउद, जयन जे वाइवा, दीपक शर्मा, सम्पादन सुरेन्द्र पौडेल ले गरेका छन् । सिनेमा आर्ट र वि मोसन पिक्चर्सको सहकार्यमा निर्माण भएको फिल्मका रौनक विक्रम कडेल निर्माता हुन् भने कार्यकारी निर्मातामा सुरज बम ठकुरी, सह-निर्मातामा एनि थापा छन् ।

फिल्मलाई गोविन्द शाहीको काफिया फिल्म्स र कुवेर सिने डिस्ट्रीब्युसनले वितरण गर्दैछन् । पोस्टर डिजाइन ट्राइडेन्ट कन्सेप्टका रोयल भिमसेनले गरेका छन् । बक्स अफिसमा राम्रो ओपनिङ गर्ने अपेक्षासहित ‘फेरि रेशम फिलिली’ अब प्रदर्शनको अन्तिम तयारीमा छ । अब फिल्मले व्यापारिक र समीक्षकीय रूपमा कस्तो प्रभाव पार्छ, त्यो प्रदर्शनपछि थाहा हुनेछ ।