१४ लाख भ्युज पार गर्दै नेपाल र कुवेतमा १ नम्बर युट्युब ट्रेण्डिङमा होस्टेल ३ को ट्रेलर

इटहरी/ यही फागुन २३ गतेबाट प्रदर्शन हुने नेपाली फिल्म ‘होस्टेल ३’ को ट्रेलर सार्वजनिक भएसँगै नयाँ कीर्तिमान राख्न सफल भएको छ । गएको शुक्रबार रिलिज भएको ट्रेलरले २१ घण्टामा नै १० लाख भ्युज पार गरेको छ भने विश्वका १३ देशमा ट्रेन्डिङमा रहन सफल भएको छ । ट्रेलरले नेपाल र कुवेतमा पहिलो स्थान ओगट्न सफल भयो भने कतार, पोर्चुगल, साउदी अरेबिया, रोमानिया, जापान, अस्ट्रेलिया, माल्टा, मलेसिया, दक्षिण कोरिया, र बेलायतमा पनि उल्लेखनीय स्थान हासिल गरेको छ ।

यो समाचार तयार गर्दैगर्दा ट्रेलरलाई १४ लाख २४ हजार बढी भ्युजा प्राप्त भएको छ भने ५५ हजार बढीको लाईक र ४ हजार बढीको सकारात्मक प्रतिक्रिया आएको छ । दर्शकहरूको अत्यधिक प्रतिक्रियाका बीच निर्देशक सशान कँडेलले ट्रेलरले प्राप्त गरेको मायाले आफूहरूलाई ठूलो हौसला दिएको बताए । उनले नेपाली फिल्मका लागि यो ट्रेन्डिङ ऐतिहासिक उपलब्धि भएको उल्लेख गर्दै अर्ग्यानिक रूपमा आएको भ्युजलाई आफ्नो मेहनतको प्रतिफलका रूपमा लिएका छन् । हेर्नुस् ट्रेलर।

ट्रेलरले कलेज तथा होस्टेल जीवनका रमाइला क्षणहरू, चुनौतीहरू र अनुभवहरूलाई प्रस्तुत गरेको छ । फिल्ममा पारस बम ठकुरी, सिम्रन पन्त, आशिष घिमिरे, पदम तामाङ, हेना नगरकोटी, रिहान गिरी, समा पराजुली मुख्य भूमिकामा छन् भने प्रवीण खतिवडा वार्डेनको भूमिकामा देखिएका छन् । साथै, आशिष पुरुष, रोहन श्रेष्ठ, उमर खान र सन्तोष बानियाँ पनि पनिमा देखिनेछन् । फिल्मको कथा माधव शर्माले लेखेका हुन् भने निर्देशन सशान कँडेलले गरेका छन् । निर्माता सुरेश कँडेल, कर्ण कार्की, गोविन्द अधिकारी हुन् भने सह-निर्मातामा शिशिर ज्ञवाली, अनीश सिग्देल, कुन्दन गुप्ता, र गणेश मगर रहेका छन् ।

कार्यकारी निर्माता शङ्कर कोइराला हुन् भने लाइन प्रोड्यूसर कोसिस राज क्षेत्री रहेका छन् । फिल्मका प्राविधिक पक्षहरूमा अर्जुन तिवारीको छायाङ्कन, विकास दाहालको सम्पादन र हिमाल केसीको एक्सन निर्देशन रहेको छ । संगीतमा अर्जुन पोखरेल, अल्मोडा राणा उप्रेती, महेश ज्ञवाली र किरण माइकलले योगदान दिएका छन् भने नृत्य निर्देशन प्रवीण सिंह र रोशन विश्वकर्माले गरेका छन् । फिल्मको वितरण काठमाडौं उपत्यकामा काफिया फिल्म्स (गोविन्द शाही) र उपत्यका बाहिर आरआर फिल्म्स (रोहित कट्टेल, रत्न श्रेष्ठ) ले गर्नेछन् ।