होस्टेल जीवनको रोचक पाटो समेटिएको फिल्म ‘होस्टेल ३’को ट्रेलर सार्वजनिक

इटहरी/ कलेज जीवनका उतारचढाव, मित्रताको गहिरो सम्बन्ध र होस्टेल भित्रका रमाइला–सुनौला क्षणहरूलाई पुनः पर्दामा उतार्ने नेपाली फिल्म ‘होस्टेल ३’को ट्रेलर शुक्रबार काठमाडौंमा सार्वजनिक गरिएको छ । सम्मान इन्टरटेनमेन्ट र आरोन कन फिल्म प्रा.लि.को संयुक्त ब्यानरमा निर्माण भएको यो फिल्म आगामी फागुन २३ गतेबाट प्रदर्शनमा आउँदैछ । शाहिल खानले सम्पादन गरेको ट्रेलरले होस्टेल जीवनका मात्र होइन, युवाहरूको सपनासँग जोडिएका संघर्ष र रोमाञ्चक अनुभवहरूलाई पनि उजागर गर्छ ।

ट्रेलरमा पारस बम ठकुरी, सिम्रन पन्त, आशिष घिमिरे, पदम तामाङ, हेना नगरकोटी, रिहान गिरी, समा पराजुली लगायतका कलाकारको जीवन्त अभिनय देख्न सकिन्छ । अभिनेता प्रवीण खतिवडा वार्डेनको भूमिकामा छन् भने आशिष पुरुष, रोहन श्रेष्ठ, उमर खान र सन्तोष बानियाँ प्रतिपक्षी भूमिकामा देखिएका छन् । ‘होस्टेल’ शृङ्खलाले अनमोल केसी, सलोन बस्नेत, स्वस्तिमा खड्का, नाजिर हुसेनजस्ता कलाकारलाई स्थापित गरेको थियो । हेर्नुस् ट्रेलर ।

अब, ‘होस्टेल ३’ले पनि नयाँ पुस्ताका कलाकारलाई मौका दिने संकेत गरेको छ । फिल्मको निर्देशन सशान कँडेलले गरेका छन्, जसले दुई दशकभन्दा बढी समयदेखि सङ्गीत तथा म्युजिक भिडियो निर्देशनमा अनुभव संकलन गरिसकेका छन् । माधव शर्माले लेखन तथा एसोसियट निर्देशनको जिम्मेवारी सम्हालेका छन् । सुरेश कँडेल, कर्ण कार्की, गोविन्द अधिकारी निर्माताका रूपमा छन् भने शिशिर ज्ञवाली, अनीश सिग्देल, कुन्दन गुप्ता र गणेश मगर सह-निर्माताका रूपमा जोडिएका छन् । कार्यकारी निर्माता शङ्कर कोइराला र लाइन प्रोड्यूसर कोसिस राज क्षेत्री हुन् ।

अर्जुन तिवारीको छायाङ्कन, विकास दाहालको सम्पादन, हिमाल केसीको एक्सन निर्देशन, अर्जुन पोखरेल, अल्मोडा राणा उप्रेती, महेश ज्ञवाली र किरण माइकलको सङ्गीत तथा प्रवीण सिंह र रोशन विश्वकर्माको नृत्य निर्देशन रहेको फिल्म युवा दर्शकमाझ लोकप्रिय हुने अपेक्षा गरिएको छ । फिल्मको वितरण काठमाडौं उपत्यकामा काफिया फिल्म्स (गोविन्द शाही) र उपत्यका बाहिर आरआर फिल्म्स (रोहित कट्टेल, रत्न श्रेष्ठ) ले गर्नेछन् । ट्रेलरमा देखाइएका रोचक दृश्य, जोशिला संवाद र युवा पुस्तालाई प्रत्यक्ष रूपमा छुने कथा प्रवाहका कारण ‘होस्टेल ३’ले अघिल्ला शृङ्खलाजस्तै दर्शकमाझ लोकप्रियता कमाउने विश्वास गरिएको छ ।