कलेज जीवनको वास्तविकता झल्काउने फिल्म ‘होस्टेल ३’ यही फागुन २३ देखि प्रदर्शनमा आउँदै

इटहरी/ कलेज जीवनका अविस्मरणीय क्षणहरूलाई पर्दामा उतार्दै आएको चर्चित फिल्म शृङ्खला ‘होस्टेल’को तेस्रो भाग ‘होस्टेल ३’ यही फागुन २३ गतेबाट दर्शकमाझ आउँदैछ । पहिलो शृङ्खला ‘होस्टेल’ले युवाहरूको संघर्ष, मित्रता, प्रेम, र सपनालाई उजागर गर्दै अनमोल केसी र सलोन बस्नेत जस्ता कलाकारहरूलाई स्टारडममा पुर्‍यायो । त्यसपछि ‘होस्टेल रिटर्न्स’ले स्वस्तिमा खड्का, नाजिर हुसेन र सुशील श्रेष्ठलाई दर्शक माझ चिनायो । अब, सोही सफल यात्रालाई निरन्तरता दिँदै ‘होस्टेल ३’ पनि नेपाली युवाहरूको कथा बोल्न आइरहेको छ ।

तेश्रो शृङ्खलाको मुख्य पात्रहरूमा पारस बम ठकुरी, रिहान गिरी, आशिष घिमिरे र पदम तामाङ रहेका छन् । कुलब्वाईको रूपमा चर्चित पारस बम ठकुरी, ‘भ्वाइस अफ नेपाल’बाट परिचित रिहान गिरी, ‘मेरी बास्सै’मा ‘धुन्धुकारी’को रूपमा देखिएका आशिष घिमिरे र सिक्किमका चर्चित कमेडियन पदम तामाङ यो फिल्मका आकर्षण हुन् । साथै, सिम्रन पन्त, हेना नगरकोटी र समा पराजुलीले कलेज जीवनका प्रेम, प्रतिस्पर्धा र आत्मनिर्भरता झल्काउने भूमिका निभाएका छन् ।

शसान कँडेलको निर्देशनमा तयार भएको ‘होस्टेल ३’ मा उमर खान, सन्तोष बानियाँ, रोहन श्रेष्ठ र आशिष् पुरुषलगायतका कलाकारहरूको पनि दमदार अभिनय देख्न पाइनेछ । यतिबेला फिल्मका गीतहरूले पनि चर्चा पाइरहेका छन् । अलमोडा राणा उप्रेतीको स्वर, सङ्गीत, र शब्दमा तयार भएको ‘टिक टिक टिक’ले कलेज जीवनको मस्ती र रमाइलोपन झल्काउँछ । यता अर्जुन पोखरेलको सङ्गीतमा बनेको ‘मनमा अनौठो’ ले युवा प्रेमलाई सुन्दर ढंगले प्रस्तुत गरेको छ । यी गीतहरू टिकटक तथा अन्य सामाजिक सञ्जालमा भाइरल भइसकेका छन् ।

माधव शर्माको लेखनमा तयार भएको यो फिल्मलाई सम्मान इन्टरटेनमेन्ट र आरोन कन फिल्म्सले निर्माण गरेका छन् । सुरेश कँडेल, कर्ण कार्की र गोविन्द अधिकारी निर्माता रहेका छन् भने कार्यकारी निर्माता शङ्कर कोइराला हुन् । फिल्म नेपालसहित विभिन्न देशहरूमा एकैसाथ प्रदर्शनमा आउने तयारीमा छ । ‘होस्टेल ३’ केवल मनोरञ्जन मात्र नभएर कलेज जीवनको वास्तविकता झल्काउने कथा हो, जसले दर्शकहरूलाई हँसाउने मात्र होइन, उनीहरूलाई आफ्नै स्मृतिहरूमा पुर्‍याउनेछ । अब हेर्न बाँकी छ, ‘होस्टेल ३’ ले नेपाली युवाहरूको मन कति जित्न सक्छ ।