वृत्तचित्र ‘अजिमा’को ईटहरीमा विशेष प्रदर्शन सम्पन्न

इटहरी/ नेपालका विविध सांस्कृतिक परम्परा र लैङ्गिक पहिचानलाई केन्द्रमा राखेर निर्माण गरिएको वृत्तचित्र ‘अजिमा’ को विशेष स्क्रिनिङ इटहरीस्थित इलाइट सिनेमा हलमा सम्पन्न भएको छ । हिजो मङ्गलबार साँझ ५ बजेदेखि आयोजना गरिएको उक्त डकुमेन्ट्री प्रदर्शनमा विभिन्न विशिष्ट व्यक्तित्व, समाजसेवी तथा पत्रकारहरूको उल्लेखनीय उपस्थिति रहेको थियो ।

८० मिनेट लामो यो वृत्तचित्रलाई लेखक तथा निर्माता सुनिल बाबु पन्तले लेखन, निर्माण तथा निर्देशन गरेका हुन् । मातृसत्तात्मक र पितृसतात्मक परम्पराहरूलाई केन्द्रीत गर्दै यसमा छ प्रकारका लैङ्गिक पहिचानको विविधता प्रस्तुत गरिएको छ । कार्यक्रममा प्रमुख अतिथिका रूपमा कोशी प्रदेशका सभामुख माननीय अमर बाहादुर बिष्ट रहेका थिए भने विशिष्ट अतिथिका रूपमा माननीय सपना परियारको उपस्थिति थियो ।

कार्यक्रमको सभापति समेत रहेका डकुमेन्ट्रीका लेखक तथा निर्माता सुनिल बाबु पन्तसँगै समाजसेवी संगीता पोख्रेल, स्वतन्त्र पार्टीकी नेतृ देविका भण्डारी, लीभ नेपाल अध्यक्ष सुशील पौडेल स्वेच्छा, लिभ नेपाल दमककी कार्यक्रम संयोजक नुमा लिम्बू, यौनिक तथा लैङ्गिक अल्पसंख्यक समुदायकी प्रतिनिधि सिता राजधानी, महिला सञ्जाल सुनसरीकी अध्यक्ष योषा गुरागाईं, इटहरी नगरप्रमुखका सचिव एडी राज लगायतको उपस्थिति रहेको थियो ।

यस्तै, दमक नगरपालिकाका प्रतिनिधिहरू रिना आचार्य, समीक्षा रम्तेल, नेत्र न्यौपाने, स्मिता अधिकारी, सृजना थापा, विपना बास्तोला, निश्चल दाहाल लगायतका व्यक्तित्वहरूको समेत सहभागिता रहेको थियो । स्क्रिनिङपछि वृत्तचित्रबारे आफ्नो धारणा राख्ने वक्ताहरूमा इटहरी उपमहानगरपालिका सामाजिक शाखा प्रमुख संगीता पोख्रेल, लिभ नेपालका अध्यक्ष सुशील पौडेल स्वेच्छा र प्रमुख अतिथि सभामुख अमर बाहादुर बिष्ट रहेका थिए ।

वृत्तचित्रका निर्माता तथा लेखक सुनिल बाबु पन्तले सम्पूर्ण सहभागीलाई धन्यवाद दिँदै नेपालमा विद्यमान सांस्कृतिक विविधता तथा लैङ्गिक पहिचानबारे अन्तरदृष्टि प्रदान गर्ने प्रयास गरिएको उल्लेख गरे । मायाको पहिचान नेपाल नामक संस्थाले आयोजना गरेको यो स्क्रिनिङ निःशुल्क रहेको थियो । स्विस एजेन्सी फर डेभलपमेन्ट एण्ड कोअपरेशन (SDC), युरोपियन युनियन इन नेपाल र स्विजरल्याण्डको राजदूतावासको सहयोगमा सम्पन्न कार्यक्रमले नेपालमा रहेका विविध सांस्कृतिक पक्षहरूको अध्ययन तथा लैङ्गिक पहिचानबारे थप अन्तरदृष्टि प्रदान गर्ने अवसर प्रदान गरेको आयोजकहरूले बताएका छन् ।