फिल्म ‘यो मन त मेरो नेपाली हो’ आगामी असार २७ गतेबाट रिलिज गरिने

इटहरी/ नेपाली भाषा, साहित्य, कला र पहिचानलाई पर्दामा उतार्ने उद्देश्यसहित निर्माण भएको फिल्म ‘यो मन त मेरो नेपाली हो’ आगामी वर्ष २०८२ को असार २७ गतेबाट देशभर प्रदर्शनमा आउने भएको छ । फिल्मका निर्माता ज्ञान बहादुर प्रधान (रोशन) ले प्रदर्शन मिति सार्वजनिक गरेका हुन् । साहित्यकार नर प्रधान (मित्र) को निर्देशन तथा कथामा बनेको यस फिल्मले विदेशमा रहेका नेपालीहरूको भावना, भाषा र संस्कृतिप्रतिको सम्बन्धलाई उजागर गर्छ ।

नेपाली पहिचानलाई जीवन्त राख्न र भाषा-संस्कृतिप्रति नयाँ पुस्तालाई आकर्षित गराउन यो फिल्म तयार पारिएको हो । शिवम् अधिकारीको लेखनमा बनेको फिल्मले नेपाली भाषा, इतिहास र यसको महत्वलाई उजागर गर्न खोजेको छ । रोशन श्रेष्ठ, विजय बराल, विल्सन विक्रम राई, बुद्धि तामाङ ‘हैट’, आयुषा समाल, नारायण खाती, भुपेन्द्र लिङ्देन ‘मन्त्री’, सुबास भण्डारी, विजय सुब्बा, विजिता बर्देवा, देवराज राजबंशी लगायतका कलाकारहरूले अभिनय रहेको छ ।

यो फिल्ममा दिपक शर्मा, विकास चौधरी र तोरम्पा हाङ राईको संगीत, सौरभ लामाको छायांकन, बनिश शाहको सम्पादन, देव महर्जनको द्वन्द्व निर्देशन, रेनिश फागोको कलर ग्रेडिङ तथा कविराज गहतराज र प्रमोद भण्डारीको कोरियोग्राफी समावेश गरिएको छ । यो फिल्म ‘यो मन त मेरो नेपाली हो’ लाई आरआर फिल्मस् प्रा.लि.ले वितरण गर्ने निर्माण युनिटले जनाएको छ ।