बदला, एक्सन र रहस्यको संकेतसहित ‘कर्मा’को फस्टलुक पोस्टर

इटहरी/ ‘ह्वाट गोज अराउन्ड, कम्स अराउन्ड’-पोस्टरमा उल्लेख गरिएको यो स्लोगनले फिल्म ‘कर्मा’ बदला प्रधान कथा बोकेको संकेत गर्छ । निर्माण टिमले सार्वजनिक गरेको फस्टलुक पोस्टरमा विपीन कार्कीलाई सर्ट गनसहित उभिएको देख्न सकिन्छ, जसले उनलाई एक्सन अवतारमा प्रस्तुत गरेको छ । ब्ल्याक जिन्स, फिट बडी, गम्भीर हावभाव र हातमा सर्ट गन । विपीनको यो लुक्सले फिल्म एक्सन प्रधान हुने स्पष्ट झल्काउँछ ।

पोस्टरको कलर टोन र सम्पूर्ण गेटअपले बदला लिने पात्रको गहिरो मनोभावनालाई चित्रित गरेको छ । यदि सार्वजनीक पोस्टरले दिएको संकेत सही सावित भयो भने ‘कर्मा’ मार्फत विपीन कार्की पहिलोपटक एक्सन जनरामा देखिनेछन् । दर्शकहरूका लागि उनीबाट फरक अवतार हेर्न पाइने अवसर हुनेछ । फिल्मलाई ‘अगस्त्य’ फेम्ड निर्देशक सौरभ चौधरीले निर्देशन गरिरहेका छन्, जसले यसको कथा पनि लेखेका हुन् ।

आगामी चैत २९ गतेबाट प्रदर्शनमा आउने यो फिल्ममा विपीनसँगै उपासना सिंह ठकुरी, मुकुन भुसाल, दिव्यदेवलगायत कलाकारको अभिनय रहनेछ । मुकुन भुसाल यो फिल्ममा नेगेटिभ भूमिकामा छन् । आर्टिस्टिक इन्टरटेनमेन्टको प्रस्तुति मा बन्ने ‘कर्मा’ मा वसन्त लम्सालको लगानी छ । निर्देशक चौधरीको अघिल्लो फिल्म ‘अगस्त्यः च्याप्टर १’ ले दर्शक र समीक्षकबाट राम्रो प्रतिक्रिया पाएको थियो ।