बालगायक अशोक दर्जी अभिनीत ‘मन बिनाको धन’ को छायांकन सुरु

इटहरी/ संगीतबाट चर्चामा आएका बालगायक अशोक दर्जी अब फिल्ममा पनि देखिने भएका छन् । गायक तथा संगीतकार टंक बुढाथोकीको निर्माण तथा निर्देशनमा बन्न लागेको फिल्म ‘मन बिनाको धन’मा उनी शीर्ष भूमिकामा रहनेछन् । शुक्रबार भक्तपुरको बालकोटबाट फिल्मको छायांकन सुरु भएको छ । फिल्मको छायांकनअघि कोटेश्वर महादेव मन्दिरमा विशेष मुहूर्त पूजा गरिएको थियो ।

सो अवसरमा अभिनेता सरोज खनालले कल्याप बजाएका थिए भने व्यवसायी टीका बुढाथोकीले नरिवल फोडेर शुभकामना दिएका थिए । मुहूर्त सट् अशोक दर्जी र सन्तोष पन्तले दिएका थिए । भक्तपुरका साथै काठमाडौं र तनहुँमा छायांकन हुने फिल्मको कथा सामाजिक विषयवस्तुमा केन्द्रित छ । टंक बुढाथोकी कै चर्चित गीत ‘मन बिनाको धन’ बाट फिल्मको शीर्षक राखिएको हो ।

फिल्ममा सरोज खनाल, सन्तोष पन्त, रमा थपलिया, नीता ढुंगाना, भोला सापकोटा, बुद्धि तामाङ, रमेश विश्वकर्मा, रवीन्द्र झा, उत्सव सापकोटा, एआर बुढाथोकी, शंकर श्रेष्ठ, साम्राज्ञी थापा, बिना राउत, बाबु पराजुली, रक्षा श्रेष्ठ, प्रियंका झा, विनय अधिकारी, आर्यन नेपाल र विजय डंगोलको अभिनय रहनेछ । शिवम अधिकारी द्वारा लेखिएको पटकथामा निर्माण हुन लागेको फिल्मलाई बैंकटेश्वर इन्टरटेनमेन्ट ले वितरण गर्नेछ ।

फिल्मका निर्मातामा विष्णुमाया नेपाली, सह-निर्मातामा जीपी संग्रौला, लक्ष्मी गिरि, विवेक नेपाल र विजया पाण्डे छन् भने कार्यकारी निर्मातामा मिनु शर्मा रहेकी छन् । यो फिल्म अशोक दर्जीको पहिलो अभिनय यात्रा हो । उनी यसअघि ‘मन बिनाको धन’ गीतमा फिचर्ड भइसकेका थिए, जसले उनको जीवनमा ठूलो परिवर्तन ल्याएको थियो । हाल उनी काठमाडौंस्थित एक विद्यालयमा कक्षा ८ मा अध्ययन गरिरहेका छन् ।