इजिप्टमा हुने ‘मिस इको इन्टरनेशनल’मा नेपालका तर्फबाट संस्कृति भट्टले प्रतिनिधित्व गर्ने

इटहरी/ अन्तर्राष्ट्रिय सौन्दर्य प्रतियोगिता मिस इको इन्टरनेशनल २०२४ मा नेपालका तर्फबाट संस्कृति भट्टले प्रतिस्पर्धा गर्ने भएकी छन् । ग्रीन आर्ट मिडियाले उनलाई मिस इको इन्टरनेशनल नेपाल २०२४ को ताज पहिर्याउँदै इजिप्टमा आयोजना हुने यस प्रतिष्ठित प्रतियोगिताका लागि छनोट गरेको हो । शुक्रबार द स्टन्ड लाउन्ज एण्ड बार, बतिसपुतलीमा आयोजित एक विशेष समारोहमा भट्टलाई आधिकारिक रूपमा प्रतिनिधिका रूपमा सार्वजनिक गरियो । उनलाई ताज मिस इको इन्टरनेशनल नेपाल २०२५ की सलाविया महर्जन, २०२२ की शोफिया भुजेल र २०१७ की विजेता रोनाली अमात्यले पहिर्याएका थिए ।

सो अवसरमा ग्रीन आर्ट मिडियाका सीईओ प्रविन लाकौल, निर्देशक तथा मिसेज युनिभर्स नेपाल २०१९ अनिला श्रेष्ठ लगायतका व्यक्तित्वहरूको उपस्थिति रहेको थियो । मिस इको इन्टरनेशनल २०२४ आगामी अप्रिलमा इजिप्टमा आयोजना हुँदैछ, जहाँ ६० भन्दा बढी देशका प्रतियोगीहरूबीच प्रतिस्पर्धा हुनेछ । नेपालबाट एक मात्र प्रतिनिधिको रूपमा सहभागी हुँदै गरेकी संस्कृति भट्टलाई प्रतियोगिताका लागि ग्रीन आर्ट मिडियाकी प्रवन्ध निर्देशक तथा अन्तर्राष्ट्रिय कोरियोग्राफर अनिला श्रेष्ठ र नेपालका प्रतिष्ठित व्यक्तिहरूले विशेष रूपमा तयारी गराउनेछन् ।

संस्कृति भट्टले यो प्रतियोगितालाई नेपालका लागि ठूलो अवसरका रूपमा लिएको बताउँदै नेपालको संस्कृति, पर्यटन र पहिचानलाई अन्तर्राष्ट्रिय स्तरमा प्रवर्द्धन गर्ने योजना रहेको सुनाइन् । साथै, उनले अवसर प्रदान गरेकोमा ग्रीन आर्ट मिडिया प्रति आभार व्यक्त गरिन् । मिस इको इन्टरनेशनल एल.टी.सि.पि. अर्गनाइजेशन द्वारा सन् २०१४ देखि इजिप्टमा आयोजना हुँदै आएको एक प्रतिष्ठित सौन्दर्य प्रतियोगिता हो । यसको मुख्य उद्देश्य पर्यावरण संरक्षण, पर्यटन प्रवर्द्धन र विभिन्न देशका संस्कृतिहरूलाई अन्तर्राष्ट्रिय रूपमा प्रचार गर्नु हो । नेपालमा यो प्रतियोगिता सन् २०१४ देखि अनिला श्रेष्ठको नेतृत्वमा आधिकारिक रूपमा सञ्चालित हुँदै आएको छ ।