समीर भट्ट र ऋचा शर्माको क्लाइमेक्स दृश्य खिच्दै फिल्म ‘बलिदान’को छायाङ्कन सम्पन्न

इटहरी/ नेपाली फिल्म उद्योगमा बहुप्रतीक्षित मानिएको ‘बलिदान’ को छायाङ्कन चार महिनाको अथक परिश्रमपछि पूरा भएको छ । निर्देशक सन्तोष सेनको नेतृत्वमा बनेको यस फिल्मले निर्माण घोषणादेखि नै ठूलो चर्चा पाउँदै आएको थियो । शुक्रवार मोरङको हसिना सिमसारस्थित बुढासुब्बा मैदानमा समीर भट्ट र ऋचा शर्माको अभिनय रहेको अन्तिम दृश्य खिच्दै फिल्मको छायाङ्कन कार्य सम्पन्न गरिएको हो ।

निर्देशक सेनले फिल्मलाई ‘महान् चलचित्र’ बनाउने यात्रामा कुनै सम्झौता नगरेको बताएका छन् । उनले भने, “कथाको सिर्जना होस् वा कलाकार, प्रविधिको छनोट – हामीले सोचेभन्दा राम्रो गर्न सफल भयौँ।” उनका अनुसार, शारीरिक, मानसिक र भावनात्मक रूपमा चुनौतीपूर्ण भए पनि टिमले उच्च स्तरको परिणाम ल्याउने अठोट पूरा गरेको छ ।

निर्माण टोलीको मेहनतबारे बोल्दै सेनले भने, “चार महिनासम्म रगत-पसिना बगाएर काम गर्‍यौँ । यो फिल्मका लागि सबैले जुन बलिदान दिएका छन्, त्यसलाई शब्दमा मात्र धन्यवाद दिएर पुग्दैन । म विश्वस्त छु, उनीहरूको मेहनत ‘बलिदान’ मार्फत अमर रहनेछ।” फिल्मको कथा नेपालका सार्वभौम भूमिमा भइरहेको अन्याय र समाजका तथाकथित शक्तिशाली व्यक्तिहरूको विरुद्धको संघर्षमा आधारित रहेको बताइएको छ ।

फिल्मका लागि दक्षिण भारतका चर्चित एक्सन निर्देशक स्टन्डर सामको नेतृत्वमा करिब ३० जनाको टोलीले अत्याधुनिक प्रविधिसहित एक्सन दृश्य तयार पारेको छ । विशेषगरी, बुढासुब्बा मैदानमा ४२ फिट अग्लो कालीमाताको भव्य मूर्ति निर्माण गर्दै खिचिएको क्लाइमेक्स दृश्यले ठूलो चर्चा पाएको थियो । फिल्ममा ‘१२ गाउँ’ बाट चर्चित बनेका समीर भट्टको प्रमुख भूमिका रहेको छ भने सौगात मल्ल, अर्पण थापा, दिव्य देव, ऋचा शर्मा लगायतका कलाकारहरूको दमदार अभिनय देख्न पाइनेछ ।

उत्कृष्ट कलाकारहरूको सहभागिताले फिल्मलाई अझ विशेष बनाएको छ । अब फिल्मको सम्पादन कार्य सुरु हुँदैछ, जसमा पनि कुनै सम्झौता नगर्ने निर्देशक सेनले बताएका छन् । उनले भने, “अब छिट्टै टिजर रिलिज हुनेछ, जसमा रिलिज मिति घोषणा गरिनेछ ।” दर्शकहरू यस फिल्मको प्रदर्शन मिति प्रतीक्षामा रहेको र टिजरले थप उत्साह बढाउने अपेक्षा गरिएको छ ।

फिल्मको संगीत पक्ष आर्टमान्डु टिमका सदस्यहरूले सम्हालेका छन् । गायक सुजन चापागाईँ, गीतकार हर्क साउद र निर्देशक नवीन चौहानको समूहले फिल्मका गीत, ब्याकग्राउन्ड म्युजिकमा विशेष ध्यान दिएको छ । ‘आसुसेन फिल्म्स प्रा.ली.’ को प्रस्तुति रहेको ‘बलिदान’ मा पवन ब्राडफोर्ड बिस्ट निर्माता र प्रेम पुरी सह-निर्माताको भूमिकामा छन् । नेपाली फिल्म उद्योगमा ऐतिहासिक कथावस्तु र देशभक्तिपूर्ण भावनाका कारण ‘बलिदान’ले दर्शकमाझ छुट्टै स्थान बनाउन सफल हुने विश्वास गरिएको छ ।