फागुन १४ मा रिलिज हुने फिल्म ‘लाज शरणम्’को प्रोमोसनल गीत सार्वजनिक

इटहरी/ आगामी फागुन १४ गते महाशिवरात्रिको अवसर पारेर प्रदर्शन हुन लागेको वर्षकै प्रतिक्षित फिल्ममध्ये एक ‘लाज शरणम्’को प्रोमोसनल गीत ‘हेर्दा हेर्दैमा’ सार्वजनिक भएको छ । हास्य टेलिश्रृंखला ‘सक्किगोनि’ टिमले निर्माण गरेको यस फिल्ममा सिताराम कट्टेल ‘धर्मुस’ मुख्य भूमिकामा छन् भने कुमार कट्टेलले फिल्मलाई निर्देशन गरेका छन् । नवीन श्रेष्ठको निर्माणमा बनेको फिल्मको गीतमा शान्तीश्री परियार र आशिष अविरलको स्वर छ ।

आनन्द अधिकारीले लेखेको गीतमा कृष्ण भारध्वजले संगीत भरेका छन् । प्रेमी-प्रेमिकाको भावनात्मक सम्बन्ध झल्काउने गीत सरल शब्द र स्मरणीय लयको कारण एकपटक सुन्दा नै मनमा बस्ने खालको छ । गीतको भिडियोमा माला लिम्बू, गजित विष्ट लगायत फिल्मका अधिकांश मुख्य कलाकार देखिएका छन् । गजित विष्ट गेष्ट अपिरियन्समा प्रस्तुत भएका छन् । हेर्नुस् गीत तथा भिडियो ।

भिडियो तराई मधेसमा लाग्ने हाट बजारको परिवेशमा छायांकन गरिएको छ । ‘सक्किगोनि’ टिमकै कलाकारहरूले मुख्य भूमिका निर्वाह गरेको यो फिल्ममा अर्जुन घिमिरे, सागर लम्साल, हरिष निरौला, प्रियाना आचार्य, विजय बराल, महेश त्रिपाठी, अर्पण थापा, रेणु योगी, विजय लामा, मुकुन्द श्रेष्ठ लगायतको अभिनय छ । जेपिटी क्रियसनको ब्यानरमा निर्मित फिल्मका सह-निर्माता राम नरेश शाह र सृजना खड्का रहेका छन्।