‘राजागंज’को टिजर सार्वजनिक, नेपाल-भारत सीमावर्ती अपहरण काण्डको कथा

इटहरी/ आगामी चैत्र १ गतेबाट प्रदर्शनमा आउने फिल्म ‘राजागंज’को टिजर सार्वजनिक भएको छ । दीपक रौनियार निर्देशित यस फिल्मले नेपाल-भारत सीमावर्ती शहरमा भएका अपहरण घटनालाई उजागर गर्नेछ । टिजर सार्वजनिक भएसँगै दर्शकमाझ उत्सुकता बढेको देखिन्छ । विशेषगरी, टिजर आउनु अघि सार्वजनिक गरिएका मुख्य महिला पात्रहरूको लुक्सले फिल्मप्रति अझै आकर्षण बढाएको थियो ।

सात महिला पात्रलाई प्रमुख भूमिकामा प्रस्तुत गरिएको ‘राजागंज’मा दयाहाङ राई, आशा मगराती, विजय बराल, ऋचा शर्मा, गौमाया गुरुङ, पशुपति राई, पूर्व मिस नेपाल निकिता चाण्डक, पुष्पा यादव, आरती मण्डल, घनश्याम मिश्र, परमेश्वर कुमार झा, नीरज श्रेष्ठ लगायत कलाकारको अभिनय रहेको छ । यो फिल्मले भेनिस, ह्याम्बर्ग, बुसान र मुम्बईजस्ता प्रतिष्ठित अन्तर्राष्ट्रिय महोत्सवहरूमा आफ्नो प्रभाव जमाइसकेको छ । हेर्नुस् तिजर ।

गत कात्तिक महिनामै यसले पाँच ठूला फेस्टिभलहरूमा स्क्रिनिङ पाइसकेको थियो । भेनिस फिल्म फेस्टिभलमा १० मिनेटसम्म स्ट्यान्डिङ ओभेसन प्राप्त गर्नु यसले पाएको प्रशंसाको उदाहरण हो । यसबाहेक, निर्देशक रौनियारलाई प्रतिष्ठित अमेरिकी पत्रिका ‘द न्युयोर्क टाइम्स’ले संसारका नौ उदीयमान निर्देशकको सूचीमा समावेश गरेको थियो । ब्राजिलियन लेखक पाओलो कोहेलोले समेत सार्वजनिक रूपमै रौनियारको प्रशंसा गरेका थिए ।

नेपालमा टिफल्क र ब्यांकटेश इन्टरटेनमेन्टले संयुक्त रूपमा वितरण गर्ने यो फिल्म सत्य घटनाबाट प्रेरित छ । दुई अपहरित बालकको उद्धारका लागि प्रहरीले चलाएको अपरेसनमा केन्द्रित कथा प्रस्तुत गर्ने यस फिल्मको निर्माणमा आदि फिल्म्स, बासुरी फिल्म्स र तन्हाउसर गेटको सहकार्य रहेको छ । निर्माता सूचीमा निर्देशक रौनियार, अभिनेत्री मगराती, रामबाबु गुरुङ, मनिराम पोखरेल, अभिनेता दयाहाङ राई र एलन आर मिलिगन रहेका छन् ।