अभिनेत्री दिव्या रायमाझी फिल्म ‘माया प्रीति’को प्रमुख भूमिकामा अनुबन्ध

इटहरी/ अभिनेत्री दिव्या रायमाझीले नयाँ नेपाली फिल्म ‘माया प्रीति’ मा प्रमुख भूमिका निभाउने भएकी छिन् । ‘एक्टर: टेक वन’ बाट नेपाली फिल्म क्षेत्रमा डेब्यू गरेकी रायमाझीलाई माया प्रीतिका कार्यकारी निर्माता सन्तोष कुमार कार्की र क्रिएटिभ निर्देशक प्रणव जोशीले बुधबार आधिकारिक रूपमा अनुबन्ध गरेका हुन् । रोमान्टिक कमेडी शैलीको यो फिल्म अवि श्रेष्ठको निर्देशनमा निर्माण हुन गइरहेको छ । श्रेष्ठका अनुसार ‘माया प्रीति’ नयाँ पुस्ताको प्रेमकथा हो, जसले प्रेमको मूल्य र महत्त्वलाई कुनै पनि परिस्थितिमा समान रूपमा राख्ने प्रयास गर्नेछ । यो फिल्म मार्फत श्रेष्ठ निर्देशनमा डेब्यू गर्दैछन् ।

फिल्ममा अनुबन्ध भएपछि रायमाझीले आफू नेपाली फिल्मको संस्कारमा हुर्किएकाले राम्रो स्क्रिप्ट छनोट गर्न सजिलो भएको बताइन् । उनले ‘माया प्रीति’को कथा आफूले खोजेको जस्तै भएको बताउँदै आफ्नो भूमिकाबारे भने केही खुलाउन चाहिनन् । कार्यकारी निर्माता कार्कीका अनुसार रायमाझीलाई ‘माया प्रीति’ मा मुख्य भूमिका दिनुको कारण उनी ‘एक्टर: टेक वन’मा देखिएको अभिनय क्षमता हो । कथाअनुसार उनको भूमिका निकै सशक्त रहने कार्कीले बताएका छन् ।

वन टू थ्री स्टुडियोज प्रा.लि. को ब्यानरमा निर्माण हुन लागेको यो फिल्ममा अभिनेत्री निशा अधिकारी कार्यकारी निर्माताको रूपमा रहनेछिन् । निर्माण समूह नेपाल टेलिभिजनको चर्चित शो ‘प्ले इट अन’ मा पाँच वर्षसम्म काम गरिसकेको अनुभवी समूह हो । फिल्मका क्रिएटिभ निर्देशक प्रणव जोशी यसअघि सुपरहिट फिल्म ‘रेशम फिलिली’ निर्देशन गरिसकेका छन् । साथै, उनी एआई कलाकारका रूपमा पनि परिचित छन् । फिल्मको छायाङ्कन चाँडै सुरु हुने तयारी भइरहेको छ भने अन्य कलाकारहरूको घोषणा क्रमशः गरिने बताइएको छ ।