इटहरी/ नेपाली संगीत उद्योगमा जब कुनै गीत हिट हुन्छ, त्यसले एउटा विशेष प्रभाव छोड्छ । केही संगीतहरू यस्ता हुन्छन्, जुन सुन्दैमा स्रोताको मनमा बस्छन् । ‘फेरि रेशम फिलिली’ फिल्मको ‘फेरि जालमा’ त्यस्तै गीत बनेको छ, जुन अहिले दर्शकको मनमा बस्न थालेको छ । रिलिजसँगै गीतले युट्युबको म्युजिक सेक्सनमा पहिलो स्थान हासिल गरेको छ भने १७ लाख ८८ हजारभन्दा बढी भ्युज बटुलिसकेको छ ।
गायक तथा संगितकार कालीप्रसाद बाँस्कोटाले नेपाली फिल्म संगीतमा जुन स्तर स्थापित गरेका छन्, ‘फेरि जालमा’ त्यसकै अर्को उत्कृष्ट उदाहरण बनेको छ । उनको संगीत र स्वरमा सजिएको यो गीतमा सोमिया बराइलीले स्वरमा साथ दिएकी छन् भने शब्द मानसराजका छन् । सरल शब्द, आकर्षक धुन र क्याची मेलोडीका कारण यो गीत दर्शकहरूले सहजै गुनगुनाउन थालेका छन् । हेर्नुस् गीत ।
दर्शक र स्रोताले गीतलाई खुलेर रुचाइरहेका छन् । एक दर्शकले कमेन्ट गरेका छन्, ‘काली दाइको आवाजमा जादु छ, यो गीत मन छुने छ ।’ अर्का दर्शक लेख्छन्, ‘पहिलो भाग हलमा हेरेको थिएँ, यो चाहिँ साउदीमा बसेर युट्युबमा हेरें ।’ सुपुष्पा भट्टको अभिनयले दर्शकको मन जितेको छ । गीत लोकप्रिय भएसँगै फिल्म पनि प्रतिक्षाको केन्द्रमा छ । निर्देशक निरोज महर्जनका अनुसार हास्यप्रधान यो फिल्मले दर्शकलाई मनोरञ्जन दिनेछ ।
फागुन १४ मा रिलिज हुने फिल्ममा विनय श्रेष्ठ, सुपुष्पा भट्ट, कामेश्वर चौरासिया, नीर शाह, रविन्द्र झा, लक्ष्मी गिरी लगायतका कलाकारहरूको अभिनय रहेको छ । संगीतमा जादु चलाइसकेको ‘फेरि जालमा’ जस्तै फिल्म पनि दर्शकको मनमा बस्नेमा निर्माण टिम विश्वस्त छ ।
Discussion about this post