‘कमेडी किड्स’ रियालिटी शोको घोषणा, बालप्रतिभाहरूलाई नयाँ मञ्च

इटहरीl/ नेपालमा रियालिटी शोहरूको लोकप्रियता बढ्दै गएको छ र यसै क्रममा बालबालिकालाई केन्द्रमा राखेर नयाँ रियालिटी शो ‘कमेडी किड्स’ घोषणा गरिएको छ । वसन्त पञ्चमीको शुभ अवसर पारेर सोमबार रघुजी फिल्म्सले औपचारिक रूपमा यस शोको घोषणा गरेको हो । शोको औपचारिक घोषणा मध्य बानेश्वरस्थित घराना लन्ज एण्ड वारमा आयोजित पत्रकार सम्मेलनमार्फत गरिएको थियो ।

कार्यक्रममा शोको लोगो सार्वजनिक गरिनुका साथै यसबारे विभिन्न जानकारी प्रदान गरिएको थियो । रघुजी फिल्म्सका सञ्चालक रघुनाथ सापकोटाका अनुसार चारदेखि १४ वर्ष उमेर समूहका बालबालिकाहरूले यसमा भाग लिन सक्नेछन् । साथै, आगामी फागुन पहिलो सातादेखि डिजिटल अडिसन खुला गरिनेछ ।

शोको निर्देशन सन्तोष खनालले गर्नेछन् भने जुरी टिम र अन्य व्यवस्थापन टिमको टुंगो लाग्न बाँकी छ । डिजिटल पार्टनरको रूपमा ओएसआर डिजिटल र भोटिङ पार्टनरमा ओएसआर कनेक्ट रहेको छ । यद्यपि शो प्रशारण हुने टेलिभिजन च्यानलको निर्णय हुन बाँकी रहेको आयोजकले जनाएका छन् । प्रतियोगितामा विजेताले नगद पुरस्कार प्राप्त गर्नेछन्, जसले बालप्रतिभाहरूलाई थप प्रेरित गर्ने विश्वास गरिएको छ ।