जनक घर्ती मगर र अनिल बुढा मगरको ‘मितज्यू’ घोषणा, चैत्र २७ गते प्रदर्शन

इटहरी/ बसन्त पञ्चमी (सरस्वती पूजा) को अवसर पार्दै निर्माता जनक घर्ती मगर र निर्देशक अनिल बुढा मगरको नयाँ फिल्म ‘मितज्यू’ निर्माण घोषणा गरिएको छ । यो वर्षको हिट फिल्म ‘घरज्वाइँ’ निर्माण टोलीले नयाँ फिल्म बनाउने निर्णय गर्दै पोस्टर सार्वजनिक गरेको हो । सोमबार सार्वजनिक गरिएको पेन्टिङ्ग थिम पोस्टरमा दुई पात्रलाई एक सामान बोक्ने भ्यान अगाडि हातको पञ्जा जुधाइरहेको देखिन्छ ।

भ्यानको माथि खसी छ, जसको टाउकोमा कुखुराको भाले देख्न सकिन्छ । पोस्टरले फिल्मको कथावस्तु झल्काउने संकेत गरेको छ । ‘मितज्यू’ २०८२ सालको चैत्र २७ गते प्रदर्शन हुने तय गरिएको छ । ‘घरज्वाइँ’को सफलतासँगै सोही टिमले नयाँ फिल्म बनाउने निर्णय गरेको हो । ‘घरज्वाइँ’ ले ५१ औं दिन मनाउने फिल्महरूको सूचीमा परेर दर्शक र समीक्षकबाट राम्रो प्रतिक्रिया पाएको थियो ।

जिएम मुभिज प्रोडक्सन र एबीएम सिने प्रोडक्सनको ब्यानरमा निर्माण हुन लागेको फिल्मलाई नेपालमा आरआर फिल्म्स ले वितरण गर्नेछ । फिल्मका लागि हालसम्म कलाकारहरूको टुंगो लागेको छैन । निर्माता जनक घर्ती मगरका अनुसार केही दिनमा कलाकार र प्राविधिक टिमबारे जानकारी दिइनेछ । फिल्मको कथा महेश राईले लेखेका हुन् भने प्रोडक्सन कन्ट्रोलर धन बहादुर राई छन् । पोस्टर नोभिस आर्ट्सले डिजाइन गरेको हो, जसमा पेन्टिङ पुष्प आले मगरले गरेका छन् ।