इटहरी/ नेपाली फिल्म ‘लाज शरणम्’को नयाँ पोस्टर सार्वजनिक भएसँगै अभिनेता सीताराम कट्टेल ‘धुर्मुस’को अनौठो गेटअपले दर्शकको ध्यान तानेको छ । दौरा-सुरुवाल र ज्वारीकोटमा सजिएर नेताको भूमिकामा देखिएका कट्टेलले अभिवादन गरिरहेको दृश्यले उनको राजनीतिक चरित्रलाई झल्काएको छ ।
सार्वजनीक पोस्टरमा मुकुन्द श्रेष्ठ, महेश त्रिपाठी, विजय बराल, अर्पण थापा र कमलमणि नेपालजस्ता कलाकारहरूलाई प्रस्तुत गरिएको छ । साथै, कफिन बोकेका स्थानीयहरूको दृश्यले फिल्मको गहिरो सामाजिक कथावस्तु दर्शाएको छ । ‘लाज शरणम्’ हास्य टेलिश्रृंखला ‘सक्किगोनि’ को टिमले निर्माण गरेको फिल्म हो ।
अर्जुन घिमिरे (पाँडे), सागर लम्साल (बले), हरिष निरौला (क्रकोज), प्रियाना आचार्य (मुन्नी)लगायत कलाकारहरूको अभिनय रहेको यो फिल्म फागुन १४ गते महाशिवरात्रिको दिनदेखि प्रदर्शनमा आउने भएको छ । कुमार कट्टेल ‘जिग्री ब्रो’ले निर्देशन गरेको यस फिल्ममा रेणु योगी, विजय लामा, माला लिम्बुलगायत कलाकारहरूले पनि अभिनय गरेका छन् ।
फिल्मको निर्माण जेपिटी क्रियसनको ब्यानरमा भएको हो । निर्माता नवीन श्रेष्ठ, सह-निर्माता राम नरेश शाह र सृजना खड्काले फिल्मलाई भव्य बनाउन कुनै कसर बाँकी राखेका छैनन् । सुदीप बरालले छायांकन गरेको यो फिल्मलाई यस वर्षको प्रतिक्षित नेपाली फिल्ममध्ये एक मानिएको छ । राजनीतिक, सामाजिक र हास्य तत्वको मिश्रण रहेको ‘लाज शरणम्’ ले दर्शकलाई भावनात्मक र मनोरञ्जनात्मक महसुस गराउने अपेक्षा गरिएको छ ।
Discussion about this post