इटहरी/ हलिउड स्तरको नेपाली फिल्म निर्माणको प्रयासस्वरूप निर्देशक प्रदीप शाहीको तेश्रो निर्देशकीय फिल्म ‘एक्लो’ को क्यारेक्टर पोस्टर सार्वजनिक गरिएको छ । पोस्टरमा अभिनेता विजय लामालाई बृद्ध गेटअपमा ‘भिस्म’ पात्रको रूपमा प्रस्तुत गरिएको छ । भिस्मको छेउमा लेखिएको ‘इन्टरड्युसिङ्ग मुटु’ ले फिल्मको कथालाई थप रोचक बनाएको छ। फिल्मका निर्देशक शाहीले लण्डनमा पोस्ट-प्रोडक्सनको काम भइरहेको जानकारी दिएका छन् ।
हलिउड स्तरको सिनेमाटोग्राफी र प्रस्तुति दिन आफूले कुनै कसर बाँकी नराखेको बताउने शाहीले सम्पूर्ण काम सकेपछि मात्र प्रदर्शन मिति तय गर्ने योजना रहेको सुनाए । फिल्ममा विजय लामा, प्रदीप खड्का, सुनील थापा, दिया पुन, वेनिशा हमाल, दिनेश डीसी, कविता नेपाली, सुरज सिंह ठकुरी, त्रिचु राई, कृष्णभक्त महर्जन, विकास अधिकारी, दिग्गज खत्री, विनोदकुमार सुवेदी क्षितिज, श्रीशेष श्रेष्ठ, बाल कलाकार जेमिन श्रेष्ठ र स्योन सविक सिंहको साथमा बेलायती अभिनेता जेमी बेकनको अभिनय रहेको छ।
निर्माता टोलीमा राजु कुमार गुरुङ, हरि श्रेष्ठ, विष्णु तामाङ, उत्सव विष्ट, भाइराजा थापा, नवीन सिवा र बागवीर पुन रहेका छन् भने कार्यकारी निर्माता विनोद सुवेदी क्षितिज हुन् ।
बाबु श्रेष्ठको छायाङ्कन, राजु तामाङको द्वन्द्व निर्देशन, सन्तोष लामाको कला निर्देशन र शुभराज कार्की तथा द्रोण प्रसाद पौडेलको प्रोडक्सन डिजाइनले फिल्मलाई प्राविधिक रूपमा बलियो बनाउने विश्वास गरिएको छ । सार्वजनिक क्यारेक्टर पोस्टरले फिल्मप्रति दर्शकहरूको चासो बढाएको छ । ‘एक्लो’ का पात्र र कथा नेपाली सिनेमाका लागि नयाँ उचाइ स्थापित गर्न सफल हुन्छन् भन्ने आशा गरिएको छ ।
Discussion about this post