नाजिर हुसेन र सृष्टि श्रेष्ठ अभिनीत ‘मिसिङः केटी हराएको सूचना’को ट्रेलर सार्वजनिक

इटहरी/ नाजिर हुसेन र सृष्टि श्रेष्ठको प्रमुख भूमिका रहेको फिल्म ‘मिसिङः केटी हराएको सूचना’ को नयाँ ट्रेलर सार्वजनिक भएको छ । आगामी माघ ११ गते प्रदर्शनमा आउन लागेको यस फिल्मको १ मिनेट ५६ सेकेन्ड लामो ट्रेलरले पहिचानको द्वन्द्व, सामाजिक भेदभाव र प्रेमका विविध पक्षलाई उजागर गरेको छ । ट्रेलरको सुरुमा मधेसी मूलका नाजिरले पहाडी मूलकी सृष्टिलाई बन्धक बनाएको देखाइन्छ ।

घटनाक्रमले नाजिर र सृष्टिको सम्बन्धलाई उजागर गर्दै मिथिला संस्कृतिको झल्कोसमेत प्रस्तुत गर्दछ । नाजिरको संवादमार्फत मधेसी समुदायप्रति रहेको गलत धारणालाई चुनौती दिने प्रयास गरिएको छ । दीपेन्द्र गौचनको निर्देशनमा निर्माण भएको यस फिल्ममा नाजिर र सृष्टिसँगै सञ्जय गुप्ता, रामनारायण ठाकुर, मदन ठाकुर, रिना रिमाल, कौशल्या ठाकुर, ललितादेवी मिश्र, रुपेश मण्डल, सुदीप पटेल, अनिल कुर्मी, मनोज शाह, अर्जुन पोखरेल र ओमप्रकाश कर्णले अभिनय गरेका छन् । हेर्नुस् ट्रेलर ।

यो फिल्ममा अमितेष शाहले विशेष भूमिका निभाएका छन् । ट्राई सिटी पिक्चर्सको प्रस्तुतिमा बनेको यो फिल्मका कार्यकारी निर्माता नकिम उद्दिन हुन् । सह-कार्यकारी निर्मातामा मनोहर दास मुल, अनिन राजभण्डारी, राजीव थापा, रोबिन थापा, राधेश पन्तलगायतको नाम उल्लेख छ । फिल्मको कथा लेखन पनि निर्देशक दीपेन्द्र गौचनले गरेका छन् भने अमित पोखरेल र अमितेष शाह सहायक लेखकका रूपमा रहेका छन् ।

अमर महर्जनले सिनेम्याटोग्राफीको जिम्मेवारी सम्हालेका छन्। निमेष श्रेष्ठको सम्पादन, शंकर महर्जनको द्वन्द्व निर्देशन र दीपेन्द्र गौचन, प्रवेश मल्लिक तथा करुण थापाको संगीत रहेको छ । सितुसित बस्नेत, रोहित जंग क्षेत्री, प्रवेश मल्लिक, नेहा प्रियदर्शनी, करण परियार र इन्दिरा जोशीले गीतहरूमा स्वर दिएका छन् । फिल्मलाई ओएसआर डिजिटलले डिजिटल पार्टनरका रूपमा साथ दिएको छ भने एप्पल इन्टरटेनमेन्ट, रिच इन्टरटेनमेन्ट र एफडी कम्पनीले वितरण गर्नेछन् ।