‘एक्टर: टेक वन’को ट्रेलर सार्वजनिक, माघ १६ मा देशव्यापी प्रदर्शन हुँदै

इटहरी/ नेपाली फिल्म ‘एक्टर: टेक वन’ को ट्रेलर शुक्रबार काठमाण्डौमा आयोजित विशेष कार्यक्रममार्फत सार्वजनिक गरिएको छ । राजन भुसालको निर्देशनमा बनेको यो फिल्मले त्रिकोणात्मक प्रेमकथा, महत्वाकांक्षी पात्रहरूको द्वन्द्व र रहस्यमयी कथा प्रस्तुत गरेको छ । प्रदीप खड्का, आना शर्मा, दिव्या रायमाझी र राजबल्लभ कोइरालाको मुख्य भूमिका रहेको यस फिल्ममा प्रदीपको महत्वाकांक्षी पात्रको संघर्षको कथा देखाइएको छ ।

राजबल्लभ कोइराला ग्रे क्यारेक्टरमा प्रस्तुत भएका छन्, जसले षड्यन्त्र र द्वन्द्व सिर्जना गर्छन् । ट्रेलरमा निश्चल बस्नेतको इन्ट्रीलाई सस्पेन्सपूर्ण बनाइएको छ । दिलीप रायमाझीकी छोरी दिव्या रायमाझीको डेब्यु रहेको यस फिल्ममार्फत अभिनेता राजबल्लभ कोइराला १० वर्षपछि ठूलो पर्दामा फर्किएका छन् । अदृत फिल्म्स र मोती फिल्म्सको संयुक्त प्रस्तुति रहेको फिल्मको कथा आकाश बराल र निर्देशक भुसालले लेखेका हुन् । हेर्नुस् ट्रेलर ।

फिल्मको छायांकन नरेन्द्र मैनालीले, सम्पादन निमेष श्रेष्ठले र संगीत हर्कुलस बस्नेत, रोहित शाक्य र एलिस कार्कीले गरेका छन् । द्वन्द्व निर्देशन अष्ट महर्जन, कला निर्देशन कृष्णमान तामाङ र नृत्य कोरियोग्राफी शिशिर खाती तथा किरण थापाले गरेका छन् । फिल्म ‘एक्टर: टेक वन’ लाई एप्पल इन्टरटेन्मेन्ट र डिसिएनले वितरण गर्दैछन् । ट्रेलरमा देखिएको प्रेम, द्वन्द्व र रहस्यले दर्शकको चासो बढाएको छ, जसले माघ १६ मा प्रदर्शन हुने यो फिल्मलाई थप उत्सुकतासाथ प्रतीक्षा गरिने संकेत गरेको छ ।