‘होस्टेल ३’ले कलेज जीवनको सम्झना दिलाउँदै ‘टिक टिक टिक’ गीत सार्वजनिक

इटहरी/ फागुन २३ गते प्रदर्शनको तयारीमा रहेको फिल्म ‘होस्टेल ३’को गीत ‘टिक टिक टिक’ सार्वजनिक भएको छ । शुक्रबार सार्वजनिक गरिएको यो गीतले कलेज जीवनका उतारचढाव, संघर्ष र साथीहरूको गहिरो बन्धनलाई सङ्गीतमार्फत उजागर गरेको छ । अलमोडा राणा उप्रेतीको शब्द, सङ्गीत र स्वरमा तयार गीतमा सन्तोष राणाको र्‍याप भोकल थपिएको छ ।

“टिक टिक टिक, जाने समयसँग सिक साथी, ठिक ठिक ठिक, एक दिन हुन्छ सबै ठिक” जस्ता सन्देशपूर्ण शब्दहरूले दर्शकको मन छुने प्रयास गरेको छ । गीतमा फिल्मका प्रमुख कलाकारहरू पारस बम (कुलब्वाई), रिहान गिरि, आशिष घिमिरे, पदम तामाङ, सिम्रन पन्त, हेना नगरकोटी र समा पराजुलीको आकर्षक नृत्य प्रस्तुत गरिएको छ । ‘होस्टेल ३’ नेपाली फिल्म इतिहासमा चर्चित ‘होस्टेल’ शृङ्खलाको तेस्रो संस्करण हो । हेर्नुस् भिडियो ।

सशान कँडेलको निर्देशनमा बनेको यस फिल्ममा क्याम्पस जीवनका संघर्ष, रमाइलो क्षणहरू र साथीहरूको सम्बन्धलाई कथावस्तु बनाइएको छ । होस्टेल ३ को स्क्रिप्ट माधव शर्माले तयार पारेका हुन् भने कथा निर्देशक कँडेलकै हो । फिल्मलाई सम्मान इन्टरटेनमेन्टले आरोन कन फिल्म्ससँगको सहकार्यमा निर्माण गरेको हो । निर्माता सुरेश कँडेल, कर्ण कार्की र गोविन्द अधिकारी हुन् । यसका कार्यकारी निर्माता शङ्कर कोइराला हुन् भने सह निर्माता शिशिर ज्ञवाली, कुन्दन गुप्ता र अनीश सिग्देल रहेका छन् ।

अर्जुन तिवारीको डिओपी, हिमाल केसीको द्वन्द्व निर्देशन, विकास दाहालको सम्पादन र प्रवीण सिंह तथा रोशन विश्वकर्माको कोरियोग्राफी रहेको छ । अर्जुन पोखरेल, अलमोडा राणा उप्रेती, महेश ज्ञवाली, र किरण माइकलको सङ्गीत फिल्ममा समावेश गरिएको छ । नेपालसँगै यो फिल्म फागुन २३ गते नै विदेशका विभिन्न देशहरूमा पनि प्रदर्शन गरिनेछ । यसको नेपालका लागि वितरक आरआर फिल्म्स र काफिया फिल्म्स हुन् ।