फिल्म ‘अञ्जिला’को प्रोमोसनल गीत ‘डल्ले डल्ले खुर्सानी’ सार्वजनीक, दया र मिरूना फिचर्ड

इटहरी/ महिला राष्ट्रिय फुटबल टिमकी क्याप्टेन तथा नम्बर एक गोलरक्षक एञ्जिला तुम्बापो सुब्बाको संघर्षमय जीवनलाई पर्दामा उतार्ने नेपाली फिल्म ‘अञ्जिला’ आगामी फागुन २९ मा प्रदर्शन हुने तयारीमा छ । फिल्मको प्रचार-प्रसारको लागि निर्माण गरिएको ‘डल्ले डल्ले खुर्सानी’ बोलको गीत हालै सार्वजनिक गरिएको छ । यो गीत नितान्त फिल्मको प्रोमोसनल गीत तथा भिडियो मात्र रहेको र फिल्ममा समावेश नगरिने फिल्म निर्माण युनिटको भनाई छ ।

सार्वजनीक गीतमा राजनराज शिवाकोटीको शब्द र संगीत छ भने गायनमा उनीसँगै मेलिना राईले आवाज दिएकी छिन् । मौलिक नेपाली शब्दहरूको मिठास समेटिएको यस गीतमा दयाहाङ राई र मिरुना मगरले आफ्नो आकर्षक नृत्य प्रस्तुत गरेका छन् । कोरियोग्राफी कविराज गहतराजले गरेका हुन् भने भिडियोको सिनेमाटोग्राफी राम कुमार केसीले गरेका छन् । हेर्नुस् भिडियो ।

फिल्मका निर्देशक मिलन चाम्सले बाल्यकालदेखि खेल जीवनसम्मको संघर्ष र सफलताको कथालाई प्रस्तुत गर्दै इच्छाशक्ति र मेहनतले असम्भवलाई सम्भव बनाउन सकिन्छ भन्ने सन्देश दिने प्रयास गरेको बताएका छन् । यस फिल्ममा एञ्जिला तुम्बापो सुब्बा आफैंले पनि मुख्य भूमिका निभाएकी छिन् । अन्य कलाकारहरूमा सुनिल थापा, विजय बराल, सिर्जना सुब्बा, माओत्से गुरुङ, दयाहाङ राई, मीरुना मगर, बुद्धि तामाङ लगायत रहेका छन् । यो फिल्मको निर्माता प्रेम कुमार श्रेष्ठ रहेका छन् ।

गत मङ्सिर २३ मा हङकङमा वर्ल्ड प्रिमियर गरिएको यो फिल्मले दर्शकहरूबाट सकारात्मक प्रतिक्रिया पाएको थियो । नेपालमा प्रदर्शन हुनु अघि नै फिल्म युके, अमेरिका, अस्ट्रेलिया र जापानमा पनि प्रदर्शन गरिनेछ । फिल्मको छायाङ्कन एञ्जिलाको जन्मथलो इलामको आइतबारे, झापा र काठमाडौँमा गरिएको हो । छायाङ्कन सुदीप बराल र सम्पादन मिलन श्रेष्ठले गरेका छन् । मुन लभ इन्टरटेन्मेन्टको ब्यानरमा निर्मित यस फिल्मका सह निर्मातामा टुबेन्द्र लिम्बु, विनोद अग्रवाल र राजेश बगडिया रहेका छन् ।