फिल्म ‘नाक्छोङ’को शुभमुहूर्त: राई समुदायको ऐतिहासिक संस्कृतिक कथा पस्कने

इटहरी/ राई समुदायको समृद्ध सांस्कृतिक धरोहरलाई समेट्दै निर्माण हुन लागेको चलचित्र ‘नाक्छोङ’ (विजुवा) को छायाङ्कन बिहीबारदेखि सुरु भएको छ । कोसी प्रदेशको बेलबारी नगरपालिका वडा नम्बर १० को शान्ति चोकमा विशेष कार्यक्रम गरी चलचित्रको भव्य शुभमुहूर्त गरियो । राई समुदायका परम्परागत संस्कारलाई आत्मसात् गर्दै तीन चुला र चिन्डो पूजा गरेर मुहूर्त सम्पन्न गरिएको थियो ।

शुभ मुहूर्त कार्यक्रममा बेलबारी नगरप्रमुख दिलप्रसाद राईले एक्सन भनेका थिए भने डिरेक्टर क्यामेरा कल निर्देशक नवीन सुब्बाले गरे । वडाध्यक्ष विक्रम बान्तवाले क्यामेरा रोल र निर्देशक मिलन चाम्सले क्ल्याप गरे । याशेली योङ्हाङ र हेम दिलुङ्छाले मुहूर्त शट दिएका थिए । नगरप्रमुख राईले नेपाली संस्कृतिलाई विश्वव्यापी बनाउने अभियानमा चलचित्र क्षेत्रले पुर्याएको योगदानको प्रशंसा गर्दै निर्माण युनिटलाई धन्यवाद दिए ।

यस्तै वडाध्यक्ष विक्रम बान्तवाले आफ्नो जातीय संस्कृति संरक्षणमा यो फिल्मले महत्त्वपूर्ण भूमिका खेल्ने विश्वास व्यक्त गरे । यता निर्देशक मिलन चाम्सले फिल्म शुभमुहूर्त ऐतिहासिक शैलीमा गरिएको र यस्ता फिल्म अन्तर्राष्ट्रिय बजारले खोजिरहेको बताए । निर्माता ज्योतिराज राईले ‘नाक्छोङ’लाई राई समुदायका चाडपर्व, विवाह संस्कार, भेषभूषा र परम्परागत बिजुवाको महत्त्वलाई समेटेर निर्माण गरिने र यसलाई अन्तर्राष्ट्रिय महोत्सवमा लैजाने उद्देश्य रहेको बताए ।

यो फिल्म किरण राईको लेखन तथा निर्देशनमा निर्माण हुँदैछ । निर्देशक राईको यो तेस्रो फिल्म हो । यसअघि उनले ‘लुङा’ र ‘ज्युपैचो’ निर्देशन गरेका थिए । यसको छायांकनको जिम्मा चर्चित छायाकार बाबु श्रेष्ठले लिएका छन् । याशेली योङ्हाङ, भुवन सिंह राई , सुस्मा सुब्बा, सरोज खालिङ, बबिन राई ‘गल्फने’ अनुशा राई, सारा राई , त्रिचु राई , उत्तम राई , तयाहाङ राई , उदय सुब्बा कुरुम्बाङ, पूर्ण लिम्बु, दिनेश कोइरला, हेम दिलुङ्छा, बिनोद पोमो लगायतको अभिनय रहने छ ।

भुमिषा प्रोडक्सनको व्यानरमा निर्माण हुने फिल्ममा लन्डन सिने आई र 32 BOX UK काे सहकार्य रहने बताईएको छ । यो फिल्मको बेलबारी र काठमाडौँका रमणीय स्थानमा छायाङ्कन हुने बताइएको छ । फिल्मलाई शुभ मुहूर्त कार्यक्रममा निर्देशक नवीन सुब्बाले राई समुदायका कथालाई फिल्ममार्फत प्रस्तुत गर्न अझै धेरै प्रयास आवश्यक रहेको बताएका छन् । उनले राईहरूको रहनसहनलाई प्रामाणिक रूपमा देखाउने प्रतिबद्धता जनाएका छन् । ‘नाक्छोङ’ले नेपाली फिल्म उद्योगमा राई समुदायको सांस्कृतिक पक्षलाई उजागर गर्ने मात्र होइन, यसले नेपालको मौलिकता विश्वसामु चिनाउन महत्त्वपूर्ण भूमिका खेल्ने अपेक्षा गरिएको छ ।