फिल्म ‘ताण्डवम्’को पोस्टर सार्वजनिक, फागुन ९ देखि प्रदर्शन हुने

इटहरी/ आगामी फागुन ९ गतेबाट प्रदर्शनमा आउन लागेको फिल्म ‘ताण्डवम्’को पोस्टर सार्वजनिक भएको छ । पोष्टर सार्वजनीक भएसँगै निर्देशनमा डेब्यु गरेका जुनिम गहतराजको नयाँ प्रयासलाई लिएर दर्शकमा चासो बढेको छ । माघे संक्रान्तिको अवसर पारेर मंगलबार रिलिज गरिएको पोस्टरमा मुख्य कलाकार पुष्कर गुरुङ, प्रेम सुब्बा, सरिना मगर, अंकित खड्का, अनोज पाण्डे र निर्देशक गहतराजको क्यारेक्टर लुक्स समेटिएको छ ।

‘ताण्डवम्’ले एक नवविवाहित जोडीको जीवनमा घट्ने अनपेक्षित घटनाको कथा बोकेको छ । पारिवारिक एवं एक्सन थ्रिलर जनरामा प्रस्तुत यस फिल्मले महाशिवरात्रिको पावन अवसरलाई जोड दिँदै केही धार्मिक कनेक्सन पनि दर्शाउने तयारी गरेको छ । सिंहदेवी प्रोडक्सनको ब्यानरमा बनेको यो फिल्म धनकुमारी गहतराज, सविना मगर र मनिष गौतमले निर्माण गरेका हुन् ।

हरि घले लामाको छायांकन, सम्राट बस्नेतको एक्सन निर्देशन, सुशान्त गौतमको संगीत र कोबिद बज्रको ब्याग्राउन्ड म्युजिकले फिल्मलाई उत्कृष्ट बनाउने जमर्को गरेका छन् । यसको अनिरुद्ध आत्रेय र हुसेनले कथा, पटकथा र संवाद तयार पारेका हुन् । यसअघि ‘पानीफोटो’, ‘पशुपति प्रसाद २ : भष्मेडन’, ‘चिसो मान्छे’, ‘परस्त्री’ जस्ता दर्जनौं फिल्ममा कलरिस्टको रूपमा काम गरेका निर्देशक गहतराजले ‘ताण्डवम्’मार्फत फिल्म निर्देशनमा डेब्यु गर्ने भएका हुन् ।