इटहरी/ फिल्म ‘महाभोज’को औपचारिक घोषणा भव्य मुहूर्त पूजासँगै गरिएको छ । मङ्गलवार बिहान काठमाडौंको कमलादीस्थित गणेश मन्दिरमा प्रमुख कलाकार र निर्माण समूहको उपस्थितिमा विशेष पूजा आयोजना गरिएको हो । फिल्ममा अभिनय गर्ने प्रमुख कलाकारहरू आर्यन सिग्देल, दयाहाङ राई, खगेन्द्र लामिछाने, अञ्जना बराइली, मलिका महतदेखि वरिष्ठ कलाकार वसुन्धरा भुसालसम्मको उपस्थिति देखियो ।
साथै बुद्धि तामाङ, मोहन निरौला, पुष्कर गुरुङ, गौमाया गुरुङ, विनोद न्यौपाने, कमलमणि नेपाल, आभा अर्याल र वीरेन्द्र सिंह कुशवाह लगायतका कलाकारले पनि पूजामा सहभागी जनाएका थिए । प्राविधिक समूह र निर्माण टिमले समेत पूजामा उपस्थित भएर फिल्मको शुभारम्भ गर्यो । पोखरा आसपासका क्षेत्रमा करिब ४५ दिन छायाङ्कन हुने यो फिल्मको टिम आज बुधवार पोखरा प्रस्थान गरेको छ ।
निर्देशक दिनेश राउतले यो फिल्मलाई आफ्नो आठौँ प्रोजेक्टको रूपमा प्रस्तुत गर्दै, यसलाई आफ्नो महत्त्वाकाङ्क्षी योजना रहेको बताए । ‘महाभोज’लाई क्लक वर्क क्रियशन र पिक्चर फ्रेमको ब्यानरमा हिमाल कडरियाले निर्माण गर्दैछन् । कार्यकारी निर्माताको रूपमा किरण नेपाली र सुदिप ढकाल छन् । फिल्मको कथा विकास सुवेदीले लेखेका हुन् भने छायाङ्कन राजेश श्रेष्ठले गर्नेछन् । सम्पादन निमेष श्रेष्ठले गर्नेछन् भने ध्वनि डिजाइन उत्तम न्यौपानेको रहनेछ ।
यस्तै कला निर्देशन साजन बस्ताकोटीको, पब्लिसिटी डिजाइन रोयल भीमसेन र ट्राइडेन्ट कन्सेप्टको हुनेछ । मेकअप समरा जोशी, कस्ट्युम डिजाइन आशिष पौडेल, र केश स्टाइलिङ सरस्वती श्रेष्ठले सम्हाल्नेछन् । फिल्मको वितरण नेपालमा काफिया फिल्म्स र कुबेर सिने डिस्ट्रिब्युसनले गर्नेछन् । निर्देशक राउतले सामाजिक मुद्दालाई प्रस्ट रूपमा प्रस्तुत गर्न तयार भएको यो फिल्मले दर्शकलाई सोच्न बाध्य पार्ने विश्वास व्यक्त गरेका छन् ।
Discussion about this post