नकारात्मक शक्तिको संकेत र रहस्यमय हावी भएको फिल्म ‘मामी’को दोश्रो पोष्टर

इटहरी/ सो ट्वान्टी फाइभको ब्यानरमा निर्माण भएको हरर फ्यामिली ड्रामा ‘ममी’को दोस्रो पोस्टर सार्वजनिक भएको छ । पोस्टरमा अभिनेत्री प्रियंका कार्की डर मिश्रित भावमा पुरानो घरको अगाडि उभिएकी देखिन्छिन्, जहाँ उनको छेउमा रहेको कालो बिरालोले कथामा रहेको रहस्यलाई थप उचाइ दिएको छ ।

भित्तामा झुन्डाइएको र काँच फुटेको फोटो फ्रेममा अभिनेता तथा निर्देशक सुलक्षण भारती र बाल कलाकार आयुषी ढकाल तथा जेभिस श्रेष्ठको तस्वीर देखिन्छ । पोस्टरको यस दृश्यले घरमा कुनै अज्ञात नकारात्मक शक्तिको उपस्थिति रहेको आभास दिन्छ । निर्माण टिमका अनुसार, यो पोस्टरले दर्शकमाझ थप जिज्ञासा उत्पन्न गर्ने उद्देश्य राखेको छ ।

प्रियंका कार्की र दीया मास्के मुख्य भूमिकामा रहेका यस फिल्ममा सुलक्षण भारतीको समेत महत्वपूर्ण भूमिका रहेको छ । यस्तै समीप निरौला, घनश्याम जोशी, गीत विष्ट, आयुषी ढकाल र जेभिस श्रेष्ठलगायतका कलाकारले पनि अभिनय गरेका छन् ।

समर निरौलाको निर्देशनमा बनेको यो फिल्मको कथा समर निरौला र पूर्णिमा जोशीले लेखेका हुन् । फिल्मका निर्माता लोक राज जोशी र पूर्णिमा जोशी हुन् भने कार्यकारी निर्मातामा सुमन कोइराला रहेका छन् । छायांकन निशाल पौडेल र शरद महतोले संयूक्त रूपमा गरेका हुन् भने सम्पादन सुरेन महर्जनले गरेका छन् । काठमाडौं उपत्यकामा काफिया फिल्म्स र मोफसलमा कुवेर सिने डिस्ट्रीब्युसनले ‘ममी’लाई वितरण गर्नेछन् ।