इटहरी/ ‘११:५५’ (डु नट ट्रस्ट एनिवान) नामक क्राइम थ्रिलर फिल्मले नेपाली सिनेमाको पर्दामा नयाँ रहस्य र रोमाञ्चकता थप्ने देखिएको छ । आगामी चैत्र ८ गते प्रदर्शन हुने यस फिल्मको फर्स्टलुक पोस्टर अंग्रेजी नयाँ वर्षको पूर्वसन्ध्यामा सार्वजनिक गरिएको छ । फिल्मको पोस्टरमा प्रमुख कलाकारहरू महेश त्रिपाठी, सृष्टी श्रेष्ठ, करिष्मा श्रेष्ठ, एमएस अग्रज र नवअभिनेता सागर खनाललाई प्रस्तुत गरिएको छ ।
डेब्यु निर्देशक केशव पाण्डेले यस फिल्मको लेखन र निर्देशन गरेका छन् । उनका साथमा एमएस अग्रज र शेखर ज्ञवालीले पनि कथा लेखनमा सहयोग गरेका छन् । फिल्मको प्राविधिक पक्षलाई आकर्षक बनाउन अल्मोडा राना उप्रेतीको संगीत, कबिराज गहतराजको कोरियोग्राफी, देव महर्जनको द्वन्द्व निर्देशन, प्रद्युमन मिश्रको डिओपी र सुवास राज काफ्लेको प्रोडक्सन डिजाइन यो फिल्ममा रहने छ ।
श्याम शर्मा र सरोजा शर्माको लगानीमा बिचित्र फिल्म्स र गुड जब आर्ट्सको ब्यानरमा निर्माण भएको यो फिल्ममा बुद्धि तामाङ र विशाल पहारीको अभिनय पनि रहने छ । यो फिल्ममा कार्यकारी निर्माता एमएस अग्रज रहेका छन् भने कुवेर सिने डिस्ट्रीब्युसन प्रालिले यस फिल्मलाई वितरण गर्नेछ । रहस्य र थ्रिलरले भरिपूर्ण ‘११:५५’ ले दर्शकलाई भिन्न अनुभव दिने लक्ष्य राखेको छ, जुन पोस्टरबाटै झल्किन्छ ।
Discussion about this post