र्‍याप ब्याटल शो ‘ब्याटल भूमि’को घोषणासँगै डिजिटल अडिसन खुल्ला

इटहरी/ र्‍याप ब्याटल शो ‘ब्याटल भूमि’को डिजिटल अडिसन सुरू भएको छ । ‘नेपहपको श्रीपेच–२’ को सफलतापछि निर्माता टोलीले यो नयाँ शोको घोषणा गरेका हुन् । मङ्गलबार काठमान्डौको बालुवाटारस्थित नेपाल हाउसमा आयोजित पत्रकार सम्मेलनमा कार्यक्रमको औपचारिक शुभारम्भ गरिएको घोषणा गरियो । इच्छुक प्रतियोगीहरूले www.nepalirap.com मा गएर आफ्नो प्रस्तुतिको भिडियो अपलोड गर्न सक्नेछन् ।

डिजिटल तथा फिजिकल माध्यमबाट अडिसन हुने यस कार्यक्रममा, प्रारम्भिक चरणमा उत्कृष्ट ६४ प्रतियोगी छानिनेछन् । छनोट भएका प्रतियोगीहरूले जज राउन्डमा प्रतिस्पर्धा गर्नेछन् । डिजिटल अडिसनका लागि आवश्यक बिट श्रीपेच स्टुडियोको युट्युब च्यानलबाट डाउनलोड गर्न सकिनेछ भने कपिराइट फ्री बिटमा समेत भिडियो बनाएर पठाउन सकिनेछ ।

यो शोको विजेताले नगद ५ लाख रुपैयाँ र विभिन्न ब्रान्ड इन्डोर्समेन्टका अवसरहरू जित्नेछन् । शोका निर्माता सुदिप पोखरेलले नेपाली समाजमा र्‍याप र हिपहपको बढ्दो लोकप्रियतालाई दृष्टिगत गर्दै ‘ब्याटल भूमि’को अवधारणा ल्याएको बताए । कार्यक्रमको निर्देशन बिक्रम खनालले गर्नेछन् भने आदर्श विष्ट कार्यकारी निर्माता हुनेछन् । यसको मुख्य निर्णायकको रूपमा मानस घले रहनेछन्, जसलाई विभिन्न एपिसोडमा अतिथि निर्णायकहरूले साथ दिनेछन् ।

‘नेपहपको श्रीपेच–२’ का चर्चित प्रतियोगी मनिष ढकाल ‘मेक’ कार्यक्रम सञ्चालकको भूमिकामा देखिनेछन् । दामी मिडियाको प्रस्तुति रहेको ‘ब्याटल भूमि’को डिजिटल अडिसन पुस २६ गतेसम्म खुला रहने बताईएको छ । शोको डिजिटल पार्टनर ओ.यस.आर रियालिटी र भोटिङ पार्टनर एभेन्टोज रहेको छ ।