धीरज र मिरुनालाई लिएर ‘कुस्ती’ निर्माण घोषणा, कलाकारसँगै अब निर्माता बन्दै बुद्धि तामाङ ‘हैट’

इटहरी/ ‘हैट’ उपनामले ख्याति कमाएका हास्य अभिनेता बुद्धि तामाङ अब कलाकार सँगै फिल्म निर्माता पनि बन्ने भएका छन् । उनको निर्माण रहने यो फिल्म तमु ल्होसारको अवसरमा नयाँ फिल्म ‘कुस्ती’ घोषणा गरिएको छ । यो फिल्ममा अनिल योञ्जनको लेखन र निर्देशन रहने छ । निर्माण युनिटले फिल्मको निर्माण घोषणा सँगै प्रदर्शन मिति र पोष्टर सार्वजनीक गरेको हो ।

सार्वजनिक पोस्टरमा धीरज मगर र मिरुना मगर फिचर्ड छन् । पोस्टरमा धीरज लाइट पिङ्क ड्रेस र मिरुना लाइट ग्रीन ड्रेसमा प्रस्तुत छन् । पोस्टरमा प्रयोग भएका रङहरूले पात्रहरूको स्वभाव झल्काएको निर्देशक अनिल योञ्जन बताउँछन् । धीरजको स्वभाव लाइट पिङ्क जस्तै कोमल, जेन्टल, केयरिङ र रोमान्टिक रहेको छ भने मिरुना लाइट ग्रीन रङजस्तै प्रगतिशील र पूर्णतामा विश्वास राख्ने स्वभावकी छिन् ।

यो फिल्म ‘कुस्ती’ एक प्रेम कथा हो, जसमा धीरज र मिरुनाले सम्बन्धमा रहेका दुई पात्रको भूमिका निर्वाह गरेका छन् । यो जोडीले एकअर्कालाई धेरै माया गरे पनि आ-आफ्नो स्वभावका कारण सँगै रहन कठिनाईको सामना गरिरहेका सार्वजनिक पोष्टर बताउँछ ।

अनुषा सिनेमावुड पिक्चर्स प्रालीको ब्यानरमा निर्माण हुने फिल्म २०८२ सालको भाद्र महिनामा प्रदर्शन गरिने छ । फिल्मको वितरण काठमाडौँ भ्यालीमा रीच इन्टरटेनमेन्ट, एप्पल इन्टरटेनमेन्ट र मोफसलमा एफडी कम्पनीले गर्नेछन् ।
पोस्टरमा उमङ्ग शाहीको फोटोग्राफी र राकेश दाहालको डिजाइन रहेको छ । आगामी दिनमा फिल्मका अन्य कलाकारहरु र टिमबारे सार्वजनिक गरिने निर्माण युनिटले जानकारी गराएको छ ।