‘एक्टर: टेक वान’ को २ पोष्टर सार्वजनीक, फिल्म माघ १६ गते प्रदर्शन हुने

इटहरी/ नेपाली फिल्म ‘एक्टर: टेक वन’ आगामी माघ १६ गते रिलिज हुँदैछ । यसै अवसरमा दुई नयाँ पोस्टर र मोशन पोस्टर सार्वजनिक गर्दै फिल्मको प्रचारलाई थप तिब्र बनाइएको छ । निर्देशक राजन भुसालका अनुसार यो नयाँ ब्रान्डिङ योजना फिल्मप्रति दर्शकहरूको चासो बढाउनको लागि ल्याइएको हो । पहिलो पोस्टरमा प्रदिप खड्का, आना शर्मा, दिव्या रायमाझी र राजबल्लभ कोइराला देखिएका छन् भने दोस्रो पोस्टरमा खड्का र कोइरालालाई मात्रै प्रस्तुत गरिएको छ ।

सार्वजनीक पोस्टर डिजाइन विजय बस्यालले गरेका हुन्, जसले फिल्मका पात्र र कथालाई आकर्षक रूपमा प्रस्तुत गर्ने प्रयास गरेका छन् । पहिलो पोस्टरले पात्रहरूबीचको भावनात्मक सम्बन्धलाई उजागर गर्दा दोस्रो पोस्टरले थ्रिलर पक्षलाई प्राथमिकता दिएको छ । यसअघि सार्वजनिक गरिएको टिजरले सुपरस्टार प्रदिप खड्काका चरित्रहरूको झलक दिएको थियो, जसले फिल्मप्रति दर्शकको उत्सुकता झनै बढाएको थियो ।

सार्वजनीक पोस्टरमा प्रदिप खड्काको चोट लागेको अनुहार र राजबल्लभ कोइरालाको चुरोट समातेको दृश्यले कथामा चुनौती र शक्तिको खेल रहेको संकेत गर्छ । यो फिल्मबाट अभिनेता राजबल्लभ कोइरालाले १० वर्षपछि नेपाली फिल्ममा कमब्याक गर्न लागेका हुन् भने दिव्या रायमाझीका लागि यो फिल्म डेब्यु हो, जहाँ उनी बोल्ड र ब्यूटिफूल भूमिकामा प्रस्तुत भएकी छन् । दिव्या चर्चित अभिनेता दिलीप रायमाझीकी छोरी हुन्, जो अमेरिकाबाट फर्केर नेपाली फिल्ममा अभिनय गर्न थालेकी हुन् ।

फिल्मको निर्देशन राजन भुसालले गरेका हुन् भने स्क्रिप्ट भुसाल र आकाश बरालले लेखेका छन् । अदृत फिल्म्स र मोती फिल्मको संयुक्त प्रस्तुति रहेको यो फिल्ममा थमन कुमार भण्डारी निर्माता र अनीश भुसाल सह-निर्माताको रूपमा छन् । नरेन्द्र मैनालीको छायाङ्कन, निमेष श्रेष्ठको सम्पादन, हर्कुलस बस्नेत, रोहित शाक्य, र एलिस कार्कीको सङ्गीत, शिशिर खाती र किरण थापाको कोरियोग्राफी, अष्ट महर्जनको द्वन्द्व निर्देशन र कृष्णमान तामाङको कला निर्देशन यो फिल्ममा रहेको छ ।